Compilatiecorpus Historisch Nederlands 1.0 (CHN): ambtelijke teksten 1250-1800: gent_1492_1

<begin>
</begin>
<main>
1. Omme dieswille dat diversche persoonen die huusinghen ende erve hebben an de rivieren van der Scelde Leye Lieve moerwatere ende andere uutbrancken van diere binnen ende omtrent deser stede hemlieden over menichte van jaeren ende tyde vervoordert hebben in de zelve riviere t'hueren voordeele te nemene ende ooc te makene anwoorpen weerven pylinghen platinghen overspronghen van huusen waterrebben puttenen steeghers ende andere gherieven ter benauwinghe ende verminderthede van den rechten stroome zonder van dien de visentacie te doen ghesciene ende consent te hebbene van scepenen alsoo't behoort ende daghelicx van ghelyken bliven userende ende lanc zo meer zoude werde niet inne voorsien ende ten hende dat 't zelve gheremediert zy ende niet meer en ghebuere
2. So ghebiet men van heere ende wet weghe dat hem elc van nu voort an verdraghe zulke anwerpen pylinghen platinghen overspronghen steeghers weerven ende andere gherieven te zynen voordeele te nemene of makene zonder de plaetse alvooren ghevisiteert te zyne by scepenen ende eerfsceeders ende datte te vercheinsene jeghen de stede alsoo 't behoort up payne van die weder te weerne ende up de correctie van scepenen
3. De ghone die nu eeneghe anwerpen weerven pylinghen platinghen steeghers puttenen of overspronghen hebben buuten der plaetse ieghen de stede vercheynst zynde zullen ghehouden zyn te commene binnen zekeren tyde hier onder ghenoemt neffens den seepenhuuse up de poorte daer zy zullen vinden de ghedeputeerde ende ghecommitteerde ter audicie van den rekeninghen Janne Damman als ontfanghere van der stedecheinse ende Danneel Croeselin controleur van der voorseide nauheden van rivieren ende verclaersen huerlieder overterden ende huere boordens omme datte te beterne ter ordonnancie van scepenen welke ghebreken van den rechten stroome van den voorseiden rivieren men beteren sal naer de visitacie van scepenen ende eerfsceeders ter ordonnancie van scepenen
4. Alle de ghone die men lasten sal rekeninghe te doene ende ooc de ghone die overcommen zyn ende also bliven werden ghehouden te doen metsene boven ende beneden zo dat men by dien eeuwelic den uutcant van huerlieder erve bekennen sal ende 't zelve te vercheinsene
5. Men adverteert ooc elken die gheerft es an den stroom van der voornomder riviere ende zyn erve haut van anderen lantheere dan de stede van Ghend dat hy ghehouden es te commene by den voorseiden auditeurs ende voor ooghen bringhende zynen landheere
6. Ende alle de ghone wie zy zyn of van wiene zy huer erve hauden 't zy dat se vri es of niet evenverre dat die strect in den of an den stroom moeten bringhen de breedde wydde ende diepte van der zelven omme dien boven ende beneden ghemetst te werdene also voorseit es
7. Ende ten hende dat hem elc wachten mach van scaden zo es elcker costerie ghenomt preficxen tyt omme by den voorseiden auditeurs te commene ende vuldoene dat vorseit es
8. Te wetene de uppercosterie van Sente Jans wesende in de Kethelveste de Scelde van an den Wydenaert upwaert totter Keyserpoorte Sente Lievins poort Hueverpoort Muencmeersch over Scelde ende up 't Sant totter Coepoorte zullen commen binnen eender maent eerstcommende
9. De ondercosterie van Sente Jans van an de Coepoorte totter brugghe an den Wydenaert zullen commen binnen acht daghen daer naer
10. Sente Jacops costerie streckende tot an de Spittael poorte Dendermontsche poorte tot up den houc van der veste an de Heernesse ende also commende de Nieupoort Steendam de gracht achter de Vrydachmaerct ende an de Minnebrugghe tot alf der langher Munte ende emmer also verre als Sente Jacops costerie strect dat men heet Sente Jans huus sullen commen binnen XIIII daghen daer t'hende
11. Sente Nicolaus costerye beghinnende t'alver langher Munten lancx de Leye up totten Wittenaerde buuten Pedercelle poorte ende alf de Kethelveste zullen commen binnen acht daghen naer Sente Jacops costerie
12. De uppercosterie van Sente Michiels te wetene van achter Sente Veerelden tot t'Hender weerelt achter de Biloke de Zantpoort veste totter Leye ende de zyde van 's Princen hove totter Hooftbrugghe zullen commen binnen drie weecken naer Sente Niclaus costerye
13. De ondercosterye van Sente Michiels te wetene van an 't rabbotkin achter den wal Voghelensanghe achter den Augustinen de Ledertauwers gracht de Mourlee de Lieve ende totter Mude poorte met dat daer ancleeft zullen commen binnen drie weecken naer de voerseide uppercosterie
14. Al waeren ooc alle de plaetsen niet juuste vooren ghenoomt nochtan verstaedt hem up alle de costeryen voorscreven zonder daer up eenighe excusacie te vererighene
15. Ende zo wie in ghebreeck es te commene ten voorseiden termyne sal verbueren drie duust coreelen liete yement noch eens zo vele tyts overlyden als hier vooren ghestelt es zonder te commene sal verbueren noch zo vele coreelen ende altoos dobbelerende naer rate van tyde al t'hulpen der reparacien van der stede
16. Ende ten hende dat ditte zoude werden gherekent ende ghehouden over een gheconfirmeert statuut so sal men 't zelven stellen ende registreren in den zwarten bouc wesende 't registre van den statuuten
17. Voort omme dat niemant cause van ignorancien hebben en zoude so sal men de copie van desen hanghen in 't scepenen huus ende ter Vischmaerct
</main>
<end>
Aldus vutgheleyt den VIIe in meye XIIIIe XCIo
</end>