Compilatiecorpus Historisch Nederlands 1.0 (CHN): ambtelijke teksten 1250-1800: gent_1501_1

<begin>
</begin>
<main>
Op den IIII dagh van laumaent in 't jaer XVe een waren versaemt ter neerenster beden van Glauden Goedghebeur an d'een zyde ende Jan De Crane filius Clays als in huywelyck hebbende joucvrouwe Adriaene Goedghebeurs aen d'andered'hoyrs van joncvrouwe Joosyne Van Leyns heurlieder joncvrouwen moedere was ten huyse van den vornoemden Jan De Crane dese onderschreven persoonen op sekere pointen by den voornoemden partyen upghedaen ende ghevraeght
Eerst een kint t'huwelicke ghehadt hebbende van vadre ende van moedre leen erfve ende mueble goed ende ten overlydene van der eerster doot 't zy vadere ofte moedere up dat de voorseyde gheghifte hem hoyr fondeerde in 't voorseyde sterfhuys es te wetene wat inbrynghen men ghehouden es in te brynghene 't zy d'een heelft ofte de gheele huwelicke ghifte
Daer oppe eendrachtelyck verclaerden by trouwen ende eeren by den mont van Lieven Ghyselins te wetene Jan Van den Kethulle Gheeraert van Hoyen Jan de Crane d'oue Jan Damman Denys Heyman Symon Borluut Jan Van der Eecken ende my Marten Van den Buendere dat naer't recht van den sterfhuyse van Ghent hem elc schuldigh es te reghelene naer dese maniere
Eerst al dat vadre ende moedre haren kynderen t'huwelick gheven 't zy leen ofte erfve ofte beede met ghemeenen goede binnen huwelick gheconquesteert zynde danof sullen zy ghehouden wesen t'elcker doot d'een heelft in te brynghene ende van den leene d'helft van der weerden insghelycx van den ghereeden ende mueblen goede by vadre ende moedere t'huwelick ghegeven
2. Item ghevraeght up de ghifte van leene t'huwelick ghegeven joncvrouwe Adrianen Goedghebuers met Janne De Crane haren man ende ghecomen van joncvrouwe Joosyne Van Leyns haerlieder joncvrouwen moedre ende van diere zyden ghestruuct omme te wetene hoe men dat inbrynghen zal
Verclaersden dat men 't voorseide leen gheheel behoort in te brynghene in 't sterfhuys van haerlieder joncvrouwen moedere behoudens dat Jan De Crane ter causen van zynen wive die ten leene ghecomen es zal vermoghen met anderen goede van den zelven sterfhuyse begrooten Glauden Goedghebeurs haren broeder wel verstaende dat 't zelve begrooten van negheender arghere ofte mindere conditien en zy voor de ghene die aen 't voorseide leen recht hebben zouden indien dat de proprieteyten in't voorseide sterfhuys ghebrocht waren ten fyne dat elck hebbe naer rechte dat hem toebehoort
3. Item ghevraeght op de ghifte van den erfachticheeden commende van der zyden van der voornoemde joncvrouwe haerlieder moedre insghelycx t'huywelyck ghegeven joncvrouwen Adriaene Goedghebuers
Verclaersden naerdien dat Cranens ghezelnede haer ghefondeert heeft in 't sterfhuys van haere joncvrouwe moedre dat zou weder in 't sterfhuys brynghen sal alle de erfachticheede die zou van dier zyden ghehadt heeft ende van den ghereeden ende mueblen goede zal zou inbrynghen t'elcker doot d'een helft ofte stille staen tot d'ander hoyr van dien met andren goede ghecompenseert zy
4. Item ghevraeght indien Jan De Craene ende syn wyf hemlieden gheen hoyr ghefondeert en hadden in 't sterfhuys van haere joncvrouwe moedre ende met den huywelicke voorwaerden uutbleven waeren omme te wetene oft zy de doot van Daneel Goedghebuer ghebeden hadden ofte zo haer in syn sterfhuys niet en hadden moghen hoyr fonderen zonder in te brynghen 't huwelic goed ghecomen van der zyden haere joncvrouwe moedre
De opinie es comtter lester doot inne dat zy dan elcanderen instant doen sullen ghemerckt dat zy van eenen bedde syn nemaer men ne zal negheen blad inbrynghen
</main>
<end>
</end>