Compilatiecorpus Historisch Nederlands 1.0 (CHN): ambtelijke teksten 1250-1800: gent_1518_1

<begin>
</begin>
<main>
Omme dieswille dat diverssche personen poorters dezer stede ende andere ter inninghe van huerlieder renten payementen ende andere sculden zomtyts procederen moeten by pandinghen eyghendomme ende afwinninghen naer de wet van der poort up de husen ofte erfven binnen dezer stede ende scependomme gheleghen huerlieder debiteurs toebehorende met welcker afwinninghe de zelve personen niet verzekert ofte bewaert en zyn omme de zelve husen ofte eerfven in der eeuwicheit voor hemlieden te behoudene nemaer daer of scheeden zouden moeten met ghenouchdoene ende in rekeninghen bringhende huerlieder ontfanc ende prouffyt danof ghenomen emmers ten ware dat de zelve husen ofte eerfven behoorlic ghedecreteert ende elcken diese anstonden den meest daer omme biedende ende lest verdierende metten berrene van der keerssen vercocht worden omme daer by den debiteur te moghen hebbene den uutersten ende hoochsten penninc van zynen afghewonnenen goede ooc dat eeneghe't zelve vercopen keersberringhe ofte decreet van zulcken afghewonnenen husen ofte eerfven doen zouden moghen onbehoirlic ende up zo corten tyt dat elc daer of de wete niet hebben noch gheadverteert en zouden wezen daer uute hiernaermaels vele processen zouden moghen rysen
So eist omme daer inne te voorsiene ende reghele in 't ghuent voorscreven ghestelt te werdene dat men ghebiedt ende ordonneert van heere ende wet weghe als userende van der macht die hemlieden toebehort by den previlegie van den grave Guy
1. Dat van nu voort an elc wie hy zy die eeneghe afwinninghe van husen ofte eerfven doen wille binnen dezer stede ofte scependomme 't zy voor renten paeymenten oft andere sculden ende de zelve afghewonnene husen ofte eerfven decreteren ende met keersberringhen te coope stellen willen ghehouden werden naer de zelve afwinninghe ten minsten een maent tyts voor de eerste keersberringhe te doen doene een sondaeghs keercghebod in de viere principale keercken te wetene t' Sente Jans t' Sente Michiels t' Sente Nicolaus ende t' Sent Jacobs ende boven dien een andere keercghebot ter prochiekeercken daer ondere 't zelve huus ofte eerfve gheleghen es alzo verre als 't niet en ware onder eenich van den voorseiden vier principale keercken daerby te kennen ghevende ende elcken adverterende dat men zulc afghewonnen huus ofte eerfve decreteren ende met keersberringhen vercopen zal specifierende in 't zelve keercghebot den prefixen dach van diere met al den laste ende commere ten landtboucke staende ende andere daer uutgaende by zo goeder specificatie ende verclaerte dat elc 't zelve verstaen moghe
2. Item ende ter meerder verzekertheden van dien zo zal men alleenlic de zelve keersberringhen van nu voort an doen van twee maenden te twee maenden dat zeswaerf t'siaers daerof d'eerste wezen zal van hedent in twee maenden eerstcommende ende niet eer ende zal de afwindere ooc ghehouden wezen d'inhouden van den keercroupe van zynder vercopinghe in der manieren voorscreven gheteeckent by eenich van den secretarissen van der kuere te doen stellene ofte plackene an de dueren van der voorseide viere principale prochiekeercken ende an de ghone daer onder dat gheleghen es insghelycx an de duere van den scepenenhuse van der kuere an den houc van der Vischmaert ende voor de duere van den huse dat men zo vercopen oft decreteren wilt ende boven dien den ghonen die zulc huus ofte eerfve afghewonnen es wettelic daer of de wete ende inthimatie doen an zynen persoon 't zy by monde indien hy onder de jurisdictie dezer stede wonende es ofte by beslotene lettren van inthimatien indien hy daerbuuten woonde zoo't behoort al ooc een maendt tyts voor de zelve eerste keerberringhe zo voorseit es interdicerende elcken de zelve gheplacte briefven van den voorseiden plaetsen niet af te treckene up de correctie van scepenen
3. Item dat ghedaen ende de voornomde maendt overleden zynde zo zal men ten prefixen daghe daertoe gheordonneert volghende den keercroupe ende condicien van dien de eerste keersse van dien bernen in de camere van den scepenenhuse van der kuere in wettelicke ghebannen vierscharen aldaer de afwindere ghehouden werdt 't zelve afghewonnen huus ofte eerve inne te stellene ofte doen stellene voor zulcke somme als hem goet ende redelic dyncken zal naer welc instellen elc die 't belieft dat zal moghen verhoghen

##

8. Item ende zal ter bewarenesse van partyen van den voorseiden keersberringhen ende vercopynghen eenen registre up hem zelven by den secretaris van der vierschare ghehouden werden daer inne dat men by goeden verclaerse al in 't langhe stellen zal de keercroupen metten verhooghinghen sommen ende personen dien zulcke huusen ofte eerfven bliven zal ten fine dat men daer of altyts acte hebben moghe als men dat begheeren zal
</main>
<end>
Aldus uutgheleit den ellefsten dach van septembre anno duust vyf hondert ende achtiene
Gheteekent Uuten Dale
</end>