Compilatiecorpus Historisch Nederlands 1.0 (CHN): ambtelijke teksten 1250-1800: gent_1519_1

<begin>
</begin>
<main>
Uutte dien dat binnen dezer stede gheuseert ende inghebrocht es gheweest in 'texecuteren van den vonnessen te useren van vonnessen met bande op in 's ammans hoewel nochtans het previlegie van den grave Guy van den executien sprekende danof niet en ghewaeght ende dat scepenen van beede den bancken met mynen heere den hooch-bailliu vermoghen uut crachte van den previlegien der selver stede verleent kueren ende statuuten te makene die te veranderene meerderne ende minderne naer d'exigentie van den tyde soo eist dat myn heere de hooch-bailliu ende scepenen van beede de bancken by advise van den notablen der zelver stede hier up vergadert ende ghevraeght willende daer inne voorsien gheordonneert ende ghestatueert hebben ordene ende maniere hoe men alle vonnessen ende sententien by den voorseiden scepenen ghewyst ter executien legghen zal doende alzo te nyeuten ende abolierende by dezen de voornomde oude manieren van executien van vonnessen met bande danof men tot noch toe gheuseert heeft
1. Alvooren dat alle kennessen vonnessen ende condempnatien alnu ghepasseert ende ghewyst ofte te passerne ende wysene by scepenen van der kuere ende van ghedeele insghelycx de recoorden hemlieden van den mindren wetten overbrocht inhoudende sommen van penninghen zullen ter executie gheleyt worden by pandinghen ghebiedene ende anderssins naer de wet van der poort zo men tot hier toe gheuseert heeft by der kuere niet jeghenstaende dat die van ghedeele tot hier toe daer of niet gheuseert en moghen hebben
2. Ende de vonnessen ofte kennessen ghewyst ende overleden in actien personnelle ofte reele gheen sommen van penninghen inhoudende nemaer condempnacie van rumynghe van huuzen hantlichtinghe van gronde leveringhe ofte restitutie van goede boucken brieven ofte juweelen of eeneghe andre ghelycke zaken 't weeren of rumynghe van haute op ander lieder gront ende diereghelycke renten losselic oft onlosselic te bezettene zullen voortan ter executien gheleyt worden in der manieren hier naer verclaerst
3. Te weten ruminghe ofte leveringhe van huusen hantlichtinghe van gronde ofte goede ende diereghelycke zullen de heere ende zeven scepenen van der kuere dies versocht zynde terstont den ghecondempneerden ende zyn goet stellen uuten huuze ofte gronde ofte andre zaken die hy bezidt ende den ghonen die 't vonnesse vercreghen heeft stellen in 't ghebruic ende bezidt van dien
4. Ende staen de huusen oft syn de goedinghen gheleghen buuten den scependomme van Ghendt zo sal men danof d'executie doen doen by deursteeke ofte requisitoiren naer d'uutwysen van der privilegie zoodt behoort
5. Item ende es de sentencie oft condempnatie omme leveringhe van eeneghen juweelen boucken briefven ofte eenegherande zaken zo zal de ghone die 't zelve vonnesse gheobtineert heeft optie ende kuere hebben den ghecondempneerden te doen pandene ghebiedene oft anderssins te procedeerne naer de wet van der poort zonder vonnesse met banden in der manieren vorschreven Ende werdt hy ghepant men zal daer legghen weddeboden ter bewarenesse ende coste van zynen goede d'welc hy niet en zal moghen vercoopen ofte veranderen tot ander stont dat hy 't vonnesse volcommen zal hebben Ende wilt de crediteur mach den ghecondempneerden zo langhe in vanghenesse houden ofte weddeboden in zyn goet laten ligghen als hem believen sal emmers tot genouchdoene
6. Niet min can de vervolghere scepenen betooghene de plaetse daer dezelve juweelen boucken ofte briefven zyn 't zy in de handen van den ghecondempneerden ofte elders zo zal de heere met zeven scepenen van der kuere die uuthalen ende weeren uuten handen van den ghecondempneerden ofte andre daer die zyn ende leveren in handen van den ghonen die ze anghewyst syn

##

</main>
<end>
Aldus gheordonneert ende uuytgheleyt present Lowys van Vlaendren heere van Praet als hooghbailliu van Ghent midsgaders d'heeren Roelant De Baenst Jocob De Vettere ende hueren ghezellen als schepenen van der keure d'heer Heyndrick van Camer d'heer Lucq Minne ende heuren ghezellen als schepenen van ghedeele op den derden octobre 1519
Gheteekent Uuten Dale
</end>