Compilatiecorpus Historisch Nederlands 1.0 (CHN): ambtelijke teksten 1250-1800: gent_1524_1

<begin>
</begin>
<main>
Omme dieswille dat men voor dezen tyt abuselic ende jeghens de meeninghe van den previlegie 1 drivelicke ende draghelicke panden angaende gheprocedeert heeft so es by heere ende wette gheordonneert ende ghestatueert in der manieren naervolghende
Eerst zo wanneer yemant zal willen bringhen in vierscharen eenen beleenden pandt omme daer anne te verhalene zyn gheleent ghelt sal ghehouden zyt te doen inthimerene den ghuenen die den pandt toebehoort oft in zyn handen gheleit ende beleendt heeft te wetene es hy poortere wonachtich ofte domicilie hebbende binnen deze stede van Ghendt twee daghen voor de voorseide vierschare tot zynder domicille ofte an zynen persoon ende es hy vremde an der stede acht daghen ute voren met openbaren uutroupen up eenen voornoene ten drye stonden ten scepenenhuuse uute dynghenstyt ende ten huse binnen der stede daer hy laest logierde indien 't den crediteur kenlic es danof de boden die 't last ghenomen zullen hebben ghehouden werden rapport te doene aleer men voorder procederen zal
Item ende ten daghe van der vierschare zo zal de ghuene die den pandt daer brynghen zal als beleendt hebbende 't zy dadt zy in eenen sticke ofte meer den zelven pandt openbaerlic tooghen ende kenlic maken scepenen ende den ghuenen daer present wezende met verclaerse by eede hoe vele hy daer uppe gheleendt heeft ende of den tyt gheexpireert es van dat hy belooft hadde den zelven te bewarene
Item es den tyt gheexpireert ende de gheinthimeerde nyet en compareert te proponerene eeneghe exceptie van betalinghe daer up ghedaen hebbende ofte andere men zal den zelven pandt wisen te lossene binnen derden daghe volghende den previlegie 2 Ende werdt hy nyet ghelost binnen dien derden daghe zo zal den zelven pandt vercocht werden als den afwindere believen zal up eenen vrindach ter vrindachmaert voor 't houchuus maertdach wezende openbaerlic ontrent den thien hueren lettel voren ofte naer by den officier dezer stede daer toe ghecommitteert den meest daeromme biedende ende lest verhoghende blijvende metten derden clopslaghe
Item ende metten ghelde danof commende afghetrocken zes groote voor zynen sallaris up dat hy maer vercocht en ware een pondt groote of daer ondere ende waert dat meer golde dan een pondt groote van elcken pondt grooten zes grooten ofte in advenante sal de officier voornomt den schultheesschere zyn gheleendt ghelt betalen ende ooc de wettelicke costen van afwinnene te wetene den sallaris van den amman drye groote van der inthimatie van den bode twalef pennynghen parisis van den taelman vier grooten ende de acte van den vonnesse vyf grooten ende 't surplus scietter yet overe zal hy restitueren den ghuenen wien den pant toebehoorde
Item dies werdt de afwindere ghehouden te tooghene ende leverene den officier ter vercoopingbe acte waer voren hy den pandt afghewonnen heeft den officier leverende den zelven afghewonnen pandt van welcker leveringhe waer voren te wat tyden ende hoedanich de panden zyn de voorseide officier houden zal registre noterende daer inne den dach ende prys waervoren ende wanneer die metten derden clopslaghe bleven zyn
Ende 's daeghs voor den voorseiden coopdach naer den acht hueren ende voor den thienen zal de voorseide officier doen uutroupen metten clynckene van der belle drye waerf openbaerlic voor 't scepenen huus up de vischmaert ende up de vrindachmaert dat men 's vrindaechs daernaer ontrent den thien hueren vercopen zal goet metten stocke ende metten clopslaghe den meest daer omme biedende ende lest blivende die prouffit doen wille dat hy comme
Item ende aleer de voorseide officier zulcken pandt of panden zal moghen vercopen zo werdt hy ghehouden staende voor 't houchuus te doen vergaderen 't volc metten clynckene van der voorseider belle ten drye diversche stonden ende 't volc redelic vergadert wezende zal dan voort moghen procederen ter vercoopinghe in der voughen ende manieren voorseit
Item wert voorts de voorseide officier binnen viere daghen naer de vercopinghe ghehouden up te legghene ende betalene den afwindere zyn gheleendt ghelt ende de voorseide wettelicke costen al en hadde hy 't noch nyet ontfaen up heerlicke executie
Ware ooc de coopere nyet souffisant ofte nyet vindelic zo zal de officier den zelven pandt vercopen van nieus ten naesten vercoopdaghe in der manieren voorscreven ende verhalen an den eersten coopere de boete van drye ponden parisis t'zynen profyte by heerlicke executie als hy hem vinden zal ende bovendien alzo vele als hy min ghegolden zal hebben dan hy eerstwaerf vercocht was
Ende derghelycke zal men doen van den ghepanden roerende ende drivende catteylen totter vulcomminghe van der beghonnene executie
Dies zal hy moghen executeren heerlic binnen derden daghe naer 't vercopen den ghuenen die den pandt ghecocht heeft voor de pennynghen van den coope ghelyc men doet voor de gheprevilegierde pennynghen van der stede ende boven dien bewaren den pandt tot dat hy versekert es van zynen ghelde
Ende zal de officier daer toe ghecommitteert ende gheauctoriseert solempnelen eedt doen by scepenen van der kuere hem ghetrauwelic te employeren ende reghelen naer uutwisen der voorseider ordonnantie 't goet te vercopene zonder zyn zelfs profyt ofte yements el daer inne te souckene ofte procurerene dies werdt hy ooc ghehouden zekere souffisant te stellene omme elcken te vuldoene in der manieren voorscreven
</main>
<end>
Aldus uutgheleit ende ghepublieert in ghebannen vierscharen van der keure XXen ub sporcle in 't jaer duust vyf hondert ende dry en twintcich
</end>