Compilatiecorpus Historisch Nederlands 1.0 (CHN): ambtelijke teksten 1250-1800: gent_1545_1

<begin>
Int jaer duust vyf ondert vyf ende veertich den eersten dach van Ougste waren by scepenen van der kuere wederomme anghenomen als ghezworene eerfsceeders meesters Philips De Zomere ende Gillis Coppins up den sallaris voorwaerden ende bespreken hier naer volghende
</begin>
<main>
Eerst dat de voorseide eerfsceeders zullen ghehouden zyn alle weercken die vuten wateren ofte in straten ghetemmert ghemetst ofte andersins gedaen werden onbehoirlic daer by de rivieren ofte straten vernaut ofte ghemindert zouden werden te verbiedene ende tzelve scepenen te kennen te ghevene up huerlieder eedt so zy van ghelycken ooc ghehouden zyn te doene alle visitatien tzy ter presentie van scepenen ofte alleene by laste van hemlieden alzo wel van hooghinghen ofte nederinghen van cautchiden conduicten greppen oft andersins die der stede eenichsins zouden moghen bejeghenen
Item zyn voorts ghehouden te makene alle de beweerpen ende patroonen van den weercken der stede angaende alst scepenen an hemlieden versoucken
Item zyn ooc ghehouden alst scepenen ordonneren zullen tontfanghene ende visiterene alle de leveringhe van ysere haute ende steene die ter stede ghedaen werden of die zyn naer de beweerpen ende contracten danof ghemaect ende tonleverbaer goet te refuserene ende wederlegghene metgaders alle de weercken der stede angaende die by tasse of keersberringhen anghenomen ende ghedaen zyn te visiterene ende oversiene ende datte scepenen ofte den ontfanghere te rapporterene
Item zullen voorts ghehouden zyn ten versoucke van den ontfanghere van der yssue dezer stede te prisene ende estimerene de eerfven husen boomen ofte andere catheilen danof der stede recht van yssuwe zoude moghen competeren so zy van ghelycken ghehouden werden te visiterene ende te prisene de watermuelene dezer stede telckent alst van noode wezen zal
Item voor al welcke moeite aerbeit ende besurchsamichede de voorseide eerfsceeders hebben zullen van der stede elc jaerlicx een habyt zulcx als hemlieden by scepenen toegheleit zal werden te wetene elc van vyf ellen teenen leeuwe delle metgaders vier ponden grooten tsiaers zonder meer tzy van dachhueren of andersins ingaende tzelve pensioen den tiensten in meye vyftien hondert vyf ende veertich
Item indien zylieden vut laste van scepenen omme der stede affairen buten der stede reisen moesten so zullen zy hebben elc twee scellinghen grooten sdaeghs tware omme de priesien van den yssuwe als andersins zonder yet van partye meer texigierene
Item boven dezen zo wanneer de voorseide eerfsceeders ten versoucke van partyen met scepenen ofte alleene eeneghe eerfsceedinghen doen zullen binnen deser stede zo zullen zy hebben elc van hemlieden daer present zynde thien grooten ende buten der stede zestien groote dies werden zy ghehouden huerlieder advisen van alle eerfsceedinghen te stellene by ghescrifte ende danof te houdene note ende registre dies zullen scepenen ende partyen moghen nemen andere weerclieden ende eerfsceeders telckent alst hemlieden belieft ende goetdynct
Item ende als de voorseide eerfsceeders zullen ten versoucke van partyen stellen eeneghe palen zo zullen zy hebben tsamen van elcker pale te stellene twintich grooten
</main>
<end>
</end>