Compilatiecorpus Historisch Nederlands 1.0 (CHN): ambtelijke teksten 1250-1800: gent_1546_1

<begin>
</begin>
<main>
Omme te remedierene ende voorsiene jeghens dongheregheltheden daghelicx ghebuerende onder de practiesienen taellieden ende procureurs dezer camere ter causen van tfurnieren van den processen alzo wel in cameren als in vierscharen danof zy naer conclusie in rechte langhen tyt dilayant ende in ghebreke bliven ende nyet min vervoorderen hemlieden de zelve practisienen daghelicx texigierene ende doen tauxeren huerlieder diensten van den zelven processen daer by partyen van huerlieder rechte grootelicx verachtert ende gheinteresseert werden omme dwelcke teviterene ende ten fine dat partyen by addresse ende hulpe van den voornomden practisienen te beter expeditie zouden mogheen ghecreghen es by scepenen van der kuere gheordonneert ende ghestatueert voor een eeuwich edict ende ordonnantie dat men voortaen gheene diensten en zal moghen overgheven noch tauxeren ten zy dat de processen daer vute de zelve diensten ghesproten zyn int advis ende ghefurniert zullen wezen drye maenden te voren ende dat men daer of int overgheven van den zelven diensten ghehouden werdt behoirlic te doeerene aleer de secretaris zal vermoghen de zelve diensten overnemen of tauxeren ten waere dat de processen voor de zelve drye maenden ghetermineert ende ghewesen worden
</main>
<end>
Ghepronunchiert in ghebannen vierscharen den eersten dach van decembre int jaer duust vyf hondert zessenveertich int scependom joncheere Nicolas Triest heere van Hauweghem dher Jan Rufelaerts ende huere ghesellen
</end>