Compilatiecorpus Historisch Nederlands 1.0 (CHN): ambtelijke teksten 1250-1800: gent_1554_1

<begin>
Allen den ghonen die deze presente letteren zullen sien ofte hooren lesen scepenen ende raedt van der stede van Ghendt saluyt met kennessen der waerheden doen te wetene
</begin>
<main>
dat wy ter instantie ende verzoucke van joncheere Jan Damman heere van Oomberghe ghehoort ende gheexamineert hebben als tourbisten ende costumieren deser stede van Ghendt de naervolghende persoonen te wetene Mer Jan De Vos ruddere oudt LVIII jaeren Gillis Diericx LXXVI jaeren Joos De Rouc LXIX jaeren Lievin Van Crombrugghe LI jaeren Joos Vanderhaghen LXI jaeren Jan De Commere LV jaeren Matthys De Wilde XLIX jaeren Joos Steel LVIII jaeren Gillis Vandermuelene oudt XLV jaeren ofte elc daer ontrent up zeker intendit by ghescrifte gheexhibeert danof 't inhouden hier naer volcht van woorde te woorde

Alle costumieren ende practysienen der stede van Ghendt up eedt eendrachtelic te hoorene ende examinerene dat zylieden wel weten van allen ouden tyden binnen der voorseide stede voor recht ende costume municipael gheobserveert als dat voor eenighe personele apprehensie in 't faict van executien d'officier ghehouden es zyne executie eerst t' ontghinnene ten laste van den goeden competerende den ghecondempneerden 't welcke gheweest es ende noch daghelicx ghebuert by pandinghen legghen van weddeboden ende subsequente heerlicke ende openbare vercoopinghe metten stocke totter vulcomminghe van der zelver condempnatie ende ghewysde zaken ende in den ghevalle 't goet van den debiteur bevonden es insouffisant zo vermach alder eerst d'officier te procederene by apprehentie personnele ende incarceratie van den ghecondempneerden

Verclaren by der mont van den voornomden Mer Jan De Vos ende eendrachtelic by den anderen gheachtervolcht dat zy zo wel voor de date van der concessie van den jaere veertich als ooc 't zindert hebben ghesien ende weten useren voor costume deser voornomde stede ende noch daghelicx gheuseert werdt zo wanneer eenighe persoonen hebben condempnatie tot eens anders laste inwonende poorters wesende der zelver stede inhoudende condempnatie van eenighe liquide somme die te executerene ten laste van zulcken ghecondempneerde eerst by pandinghe van den goede van den zelven ende legghen van weddeboden ende daer naer by vercoopinghe van dien ende by faulten ende insouffisantheden van dien by apprehentie ende vanghene van den ghecondempneerden persoon ende overzulcx es van allen ouden tyden gheuseert zo wanneer de zulcke condempnatien refereren ten laste van den gedyde ende afwonenden buuten der pandinghe ende scependomme der zelver stede in de letteren van deursteke ofte executoriale die men up zulcke condempnatien gheexpediert heeft ende alnoch doet te stellene eene speciale clausule addresserende an alle officiers te wetene dat men inninghe ende verghelt van den inhoudene van der zelver condempnatie doe gheschieden alder eerst by vercoopinghe van't zelfs ghecondempneerdens eersten ende ghereetsten goede 't zy have ofte eerfve ende by ghebreke van dien by vanghene van zynen persoon van alwelcken verclaerse ende depositie de voornomde heere van Oomberghe verzochte onse openen letteren van attestatien die wy hem gheconsenteert hebben te wetene deze presente
</main>
<end>
Ghegheven in kennessen der waerheden onder den seghele van zaken der voorseide stede van Ghendt den XXIIIen dach van novembre XVe vier-en-vyftich
Gheregistreert in den bouck van den tourben f° IIe IIII° verso
</end>