Compilatiecorpus Historisch Nederlands 1.0 (CHN): ambtelijke teksten 1250-1800: gent_1564_1

<begin>
</begin>
<main>
Kenlick sy allen lieden uutte dien dat van der doodt van wylen Hans De Ruddere filius Queryns faictelick van levenden lyfve ter doodt brocht welck faict men betidende es Guilliame Simoens filius Jans by tusschenspreken van seker goede mannen namentlick over der syde van den voornomden Jan Simoens als vader van synen sone her Willem Anys her Pieter Delays beede pasteurs van der collegiale kercke van Sente Jans nu Sente Baefs Joos Codde Jan Van de Sande Rogier Van Hulle ende andere ter eender syde ende de voornoemde Queryn vadere van Remeeus De Ruddere synen sone mondtsoendere midtsgaders vrienden ende maghen van den voornomden overledenen ter andere vriendelicken pays ende accort ghemaeckt ende ghesloten es
Soo eys't dat de voornomden Guilliame mesdoendere belooft heeft by desen te commen ende comparerene in't cloostere van den Predicheeren binnen deser stede op den sevensten van meye eerstcommende in den pandt van den selven couvente de deuren open wesende in syn lynwaet blootshoofts ende beenen metten handen te gadere vallende tot dry stonden op syn knienter eerden biddende den montsoendere met synen vrienden ende maghen die aldaer present wesen sullen dat men hem duer de doodt ende lyden Christi by hem gheleden op den heylighen goeden vrydach 't faict by hem ghecommitteert in den persoon van den overledenen vergheven willen ende in teecken van volcommelicken pays den montsoendere te bedancken met eenen cus
Bovendien heeft den voornomden Jan Simoens als vader ende over synen sone den voorseyden Queryn De Ruddere belooft te betalene promptelick ten voorseyden daeghe de somme van derthien ponden paresysen die hy Queryn verschoten heeft voor't visiteren aenschauwen ende begraven met vier tortsen van den overledenen daer inne begrepen twee schellynghen thien grooten van drancken van medecynen ghehaelt ten huyse van Clays De Saleere breeder naer uutwysen van eenen billette daer de partyen particulierelick inne ghespecieert staen den selven Simoens alsnu over ende in handen ghelevert soo deselve Jan Simoens t'synen laste ghenommen heeft te betaelene ende Queryn De Ruddere in der eeuwicheyt te ontheffene van den medecynen ende chirurgienen die over den overledenen ghecommen ende hem in cueren ghehadt hebben alsoo voor de selve noch niet ghecontenteert ofte betaelt en syn insghelycx den montsoendere [] te quytene ende ontheffene jeghens den Heeren van allen boeten bruecken ende sulcx als daeranne soude moghen dependeren ende de heere naermaels mochte querelleren ende alsoo verre het toucheert het montsoen ende machsoen heeft de voornomde Jan Simoens den voornomden Queryn De Ruddere over den mesdoender belooft te betaelene in prompte pennynghen ghereede ten daeghe van den voetvalle de somme van seven en twintich ponden grooten vlaemsch omme by den selven Queryn montsoender maghen ende vrienden vanden overledenen gheemployeert ghedeelt ende ghedestribuert te worden in sulcke aelmoessen ende weldaden als hem den montsoendere vrienden ende maghen believen sal sonder dat in 'temployeren van den selven pennynghen te doene of seggen hebben Jan Simoens noch yemandt van synder syde nemaer de selve Queryn montsoendere syne vrienden ende maghen ende den montsoendere dit jeghenwordich compromis in handen te leveren sonder den last ofte cost van den montsoendere niet meer van den uutganck van schepenen secretarissen sergeanten boden dan het lichten uutter greffie ende sulcx als daeranne breeder dependeert
Ende ten fyne dat dese teghenwordighen pays in der eeuwicheyt te bet blyve sorterende ende breeder ruste vrede ende liefde tusschen beede partyen wasse ende groyen mach soo heeft den voornomden Jan Simoens by desen ghewilt dat de versekerthede by hem vercreghen ende gheobtineert van myne heeren van den Raede in Vlaenderen den seventhiensten novembre XVe dry en tsestich lestleden ten laste van den selven Queryn ende Arent De Ruddere ende oversulck synen broeder metgaders van den montsoender daerby sy verbonden staen den voornomden Simoens ende synen sone ende vrienden niet te misdoene doen misdoene in lyfve noch in goede op verbuerte van heurlieder lyfve ende goede smelt extinct ende op niet bedyde sonder in toecommenden tyden hem metten selver versekerthede noch den voornomden Queryn Arend den montsoendere heurliedere vrienden ende maghen inderlick te wesen ofte uut crachte van dien t'huerlieder laste te procederene als van der cracht ende facultheyt van dien in der eeuwicheyt renunchierende verbindende de voorseyde Jan Simoens in 't guent voorschreven ende elck point bysondere synen persoon ende goet present ende toecommende Mits desen soo hebben de montsoendere syne vrienden ende maghen de mesdoendere vergheven ende remitteren uut goeder herten 't faict by hem in den persoon van den overledenen wiens ziele godt ghenaedich wilt wesen ghecommitteert
</main>
<end>
Actum den sevensten may vyfthien hondert vier en tsestich
</end>