Compilatiecorpus Historisch Nederlands 1.0 (CHN): ambtelijke teksten 1250-1800: gent_1591_1

<begin>
Actum den IIIIen van meye 1591.
</begin>
<main>
Omme dat ter kennesse van heere ende wet commen es dat diverssche persoonen hemlieden vervoorderen daghelicx in de rivieren deser stede ende up de canten steeghers ende wattersceppen der zelver te werpene ende bringhene alle manieren van vuylicheden mes ende andere zaken daer by de zelve rivieren grootelicx vervult ende de wateren van diere gheinfecteert ende ghecorrumpeert werden ten grooten ongerieve ende dangiere van den insetenen ende elcken ende omme voortan daerinne te voorsiene so ghebiet men van heere ende wet weghe voor een eeuwich edict ende statuyt dat nyemandt wie hy zy vleeschauwere ofte andere hem en vervoordere eenighe pensen darmen bloet oft andere vuylichede commende van den beesten noch insghelycx eenich greys mes oft andere zaken daer duere de rivieren vervult ofte eenighen stanck ofte corruptie ghecauseert zoude moghen werden te werpene brynghene ofte legghene in de rivieren noch up de canten steeghers ofte wattersceppen der zelver al up de verbuerte van drye ponden parisis telcken als de contrarie by daghe ghebuerde ende by nachte naar de leste clocke up dobbel boete ende boven dien arbitrairlic ghecorrigiert te werdene by banne gheesselinghe ofte anderssins ter discretie van scepenen Ende zal ghenouch wesen tot condempnatie van den zelven boeten dat blycke by souffisante oorconden de contrarie by yemandt ghedaen zynde alwaert dat zy metten sticke nyet bevonden oft ghecalengiert en waren ende zullen de meesters ende ouders verandwoorden voor huerlieder boden kinderen ofte domesticque ende men auctoriseert hiertoe alle de dekenen van ghebuerten ende elcken particulierlick de voornoemde calaingen te moghen doene ten laste van den overtreders daer vooren de calengierdere hebben zal het derde van den gheincurreerden boeten tzynen proufite
Item dat hem nyemandt en vervoordere te maken eenighe messinghen ofte vergaderinghen van vuylichede binnen deser stede nyet meer te lande up de gemeene straten dan up de canten van de rivieren elders dan ten plaetsen daertoe hy scepenen van oudts gheordonneert ende gedestineert up ghelycke boete van III ponden parisis ende arbitraire correctie als boven
Ende omme tghuent voorscreven te bet onderhouden te werden bysondre nopende de vleeschauwers omme tlegghen van huerlieder vuylichede van pensen darmen bloet ende anderssins commende van den beesten zo es hemlieden gheconsenteert te zouckene in de uytcanten van der stede twee ofte drye bequame plaetsen daar zy huerlieder voornomde vuylichede van den beesten ghehouden zullen werden te draghene ende messinghen zullen moghen houden de welcke zy ooc sculdich werden te doen rumene telcken als die vervult zullen zyn immers ten minsten alle zes weken
</main>
<end>
</end>