Compilatiecorpus Historisch Nederlands 1.0 (CHN): ambtelijke teksten 1250-1800: gent_1615_1

<begin>
</begin>
<main>
Myn heere den hooch bailliu ende schepenen vander keure lasten ordonneren ende verbieden ande gheswoorne ende alle supposten vande chirurgyns deser stede soo ieghenwoordich als toecommende egheene persoonen ghequetst wesende soo by toedoen van anderen ofte by ongheval in wat manieren dat zy te anveerden ofte in cueren te nemen ende meesteren ten sy den chirurgyn de selve cueren anveerdende ende doende ten lancxsten des anderdaechs danof dadvertentie doende by billette an den hooch bailliu ofte onderbailliu inhaudende tselve billet den name toename ende plaetse daer den ghequetsten ligghende is ende waer de quetse ghebeurt is ende offer pericle is van steerfven of niet ten heinde daer deure de debvoiren van justitie moghen ghedaen worden dit al up paine van de ghone in faulte blivende de voorseide debvoiren te doene verbeuren sal de boete van XX pond parisis tapplicquieren conforme de concessie Caroline ghesuspendeert te worden van haerlieder styl ende boven dien arbitrairelick ghecorrigiert te worden
</main>
<end>
Actum int collegie den II january 1615
</end>