Compilatiecorpus Historisch Nederlands 1.0 (CHN): ambtelijke teksten 1250-1800: gent_1671_1

<begin>
</begin>
<main>
Alzoo men bevint dat binnen dezer stede groote ongheregheltheden ghebeuren in het faict van bauwen repareren van huysen straten ende andere edificien daerdoore het ciraet der selver stede niet alleene en wort benomen het publiek gheinteresseert met het incorporeren van den gront deser stede competerende maer groote onghevallen misverstanden ende groote processen worden veroorsaeckt tusschen de goede inwoonders ende de gone aldaer ghegoet ende gheerft zynde soo ist dat omme daer inne te voorziene mitsghaders eenichsins te secoureren de tresorie van de sware oncosten in het repareren van de straten van heere ende wets-weghe by vorme van reglement ende ordonnantie politicque gheordonneert wort het naervolghende
1. Eerst dat niemant wie hy zy tzy gheestelicke ofte werelicke ter straten ofte water waerts en zal vermoghen af te breken ofte doen afbreken eenighe edificien hoedanich die zyn oock niet omme die van nieuws op te maecken ten zy hy alvooren versoucke commissarissen uuten collegie van schepenen van der keure omme ter interventie van den ontfanghere van de wercke ende erfscheeders dezer stede den ouden gront opgenomen ende afghesteken te worden daer op men van nieuws sal moghen bauwen op peyne dat den gonen in faute blyvende sal verbeuren eene boete van hondert guldens ende by soo verre hy synen ouden gront in net minste gheexcedeert hadde zyn werck tsynen coste zal afghebroken worden
2. Zoo insgelyx niemant en sal vermoghen eenighe looven aftrecken mueren planckieren bancken bordesschen keldergaten nochte deuren ter straeten of te water waerts te maeken nochte de gone ghemaeckt te vernieuwen veranderen ofte repareren sonder visitatie ende consent alsvooren
3. Ende en zullen de wercklieden zonder dat hun blycke van het voorschreven consent niet moghen wercken an de voorschreven edificien op pene van by elck van hemlieden te verbeuren eene boete van dry ponden grooten
4. Voorts en sal niemant het greys op de strate vermoghen langher te laten ligghen als den tyt van dry daeghen ten ware ten plaetsen daer men eenighe groote edificien ware maeckende by consente van den conynck van de moorkinders binnen weleken tyt van dry daeghen den gonen het werck doende maeken oock verobligiert sal wesen van den coninck van de moorkinders te versoucken designatie van plaetse alwaer hy alleenelyck het selvc greys sal moghen doen voeren contribuerende tot elck voer tot twee stuyvers zonder meer ende sal het surpluys naer distancie van de plaetse van weghen de stadt betaelt worden
5. Wordende by desen als van ouden tyden oock verboden dat hem niemant en vervoordere an zyne huysen ter straten ofte water waerts te maecken eenige nieuwe hauten ghevels het zy dat de selve huysen te vooren met hauten ghevels hebben geweest ofte niet nemaer zal een ieghelyck ghehouden wesen de selve te maecken van steen in behoorelycke forme ende ciraet
6. Ghelyck oock niemant en sal vermoghen haute ghevels alreede ghemaeckt te repareren ofte doen schilderen in deele ofte gheheele op peyne van by den gonen het selve huys bewoonende ofte zulcx ghelast hebbende te verbeuren de boete van dertich carolus guldenen ende dat de wercklieden zulcx doende van hun ampt zullen worden ghesuspendeert voor den tyt van dry maenden
7. Dienvolghende om een ieghelyck te encouragieren ende assisteren tot het bauwen van schoone huysen zal an de gone die in de plaetse van haerlieder hauten ghevels ter strate waerts de selve sullen maecken van steen ter hoochde ten minsten van twee stagien van stadts weghe ghedaen worden zulcken bylegh als men naer de qualiteyt ende importantie van de wercke zal redelick vinden
8. Wordende niet min oock verboden in eenige steenen ghevels tzy oude ofte nieuwe te stellen ofte maecken eenighe houten cassen ofte staecken op de boete van twee ponden grooten ende dat de wercklieden sulcx ghemaeckt hebbende sullen worden gesuspendeert alsvooren
9. Ende en sal niemant vermoghen eenige nieuwe ghevels te bauwen ten zy an schepenen alvooren oock overbrynghende de modelle omme daerop ghedelibereert te worden of de selve ghemaeckt worden naer den heesch van de wercke
10 Van ghelycken dat niemant wie hy zy van nu voorts en sal vermoghen eenighe huysen logien stallen coten ofte andere edificien cleen ofte groot te decken met stroot ofte de gone ghedeckt zynde te vermaecken op de boete van twintigh pont parisis soo tot laste van den decker als den gonen zulcx ghelast hebbende ende dat den selven thunlieden coste zal afghebroken worden
11. Ende omme te voorcommen an de disputen ende sware processen die daeghelicx ghemoveert worden in het bauwen ter causen van het innemen van de tusschen weghen ende het leeden van het water door de selve tusschen weghen die voor desen gheinventeert zyn omme de huysen als dan ten meerderen deele van haut ghebauwt synde te separeren ende te beter te bevryden van den brant causerende groote romaticquieyt an beede zyden ende dat men oock bevindt dat dickmael veele schoone wercken bedorven worden door de quaethoofdicheyt van den gonen in den selven tusschenweegh gherecht synde sonder eenighen intrest grootelicx in prejuditie van het ghemeente ende ciraten deser stede wort insgelycx gheordonneert ende ghestatueert het naervolgende
12. Dat soo wanneer iemant ter straeten wil bauwen eenen nieuwen ghevel in der manieren voorschreven sal vermoghen in te nemen de tusschenweeghen met last van tzynen coste alleene te legghen de behoorlicke looden goten tusschen beede de daeken tot het leeden van het hemelwater die daernaer ten ghemeenen coste sal moeten onderhouden worden maer zoo wanneer den ghebuer door den zelven tusschenweech doet sueren eenige andere wateren zoo zal den waterloop onder moeten gheconserveert worden zonder intrest van den gebuer

##

</main>
<end>
Aldus andermael int collegie gheresolveert naer behoorlicke communicatie dien aengaende aen den heere hoogh-balliu ghedaen my toorconden eersten secretaris deser stede desen 8 january 1671
SCHOORMAN
</end>