Compilatiecorpus Historisch Nederlands 1.0 (CHN): ambtelijke teksten 1250-1800: gouda_1341_1

<begin>
WJ pauwels van ruven jacob maes ende diederich witten neve scepene jn der Goude orkonden ende kennen
</begin>
<main>
dat quam voer ons har Willem goele priester kapelaen van onser vrouwen altaer van der goude Ende lyede dat hi vercoft heuet diederich remwart soene houdere van desen brieue die thien scellinghe hollants jof payment dat dar voer gaet jars an renten die hi ghecoft hadde jegens ricout den smit Eweliken te stane vp claus damaes soens huis ende erue dat ghelegen es vp die westside van der hauene tuschen claus kupers wedue ende der steghe alle jare te betalen vp alre heyleghen dach met gelde jof met panden alse recht es van erfrenten Ende met desen brieue es ghedoet die brief die ricout hadde van desen voerseyden tien scellinghe jars sprekende vp dit voergemerket huis ende erue Ende haer willem goele heueten ouer ghegheuen die ghemaket was jnt jaer van achtentwintich vp sente peters dach ende sente pauwels
</main>
<end>
Ende omme dat dit waer es ende ghestade sel bliuen soe hebbe wi scepene voerghenoemt desen brief besegelt met onsen segelen Ghegheuen des manendages voer sente jans dach vitgaende oexte jnt jaer ons heren m ccc ende ene endeviertich
</end>