Compilatiecorpus Historisch Nederlands 1.0 (CHN): ambtelijke teksten 1250-1800: gouda_1341_2

<begin>
WJ kerstiaen bruninx soene diederich yden soen Ende gherart ludolf soene scepene jn der goude orkonden ende kennen
</begin>
<main>
dat quam voer ons diederich die brune die blokemakere Ende lyede dat hi schuldich es heinrich koeken die houder es van desen brieue thien schellinghe hollants jars an renten jof payment dat daer voer gaet Eweliken te stane vp sin huis ende erue dat hi staende heuet vp der goude Ende heuet beleghen met erue brune gherart yden soens soene vp die oestside ende florekiin die kuper vp die westside alle jare te betalen vp sente lambrechts dach jn die later goude marcht met ghelde jof met panden alse recht es van erfrenten
</main>
<end>
Ende omme dat dit vaste ende ghestade sel bliuen soe hebbe wi scepene voerghenoemt desen brief besegelt met onsen seghelen Ghegheuen des sonnendages na onser vrouwen dach jn septembar jnt jaer ons heren m ccc ende ene ende viertich
</end>