Compilatiecorpus Historisch Nederlands 1.0 (CHN): ambtelijke teksten 1250-1800: gouda_1343_3

<begin>
WJ wouter spierinck diederich witten neve ende helmaer scepene jn der Goude orkonden ende kennen
</begin>
<main>
dat quam voer ons willem die cruer florens des hontsoene Ende lyede dat hi schuldich es agheten arnt wendekins wedue houdersce van desen brieue achtendertich scellinghe ende ses peninghe hollants jof payment alsoe goet Eweliken te stane up [] den huse daer segevrijt dat wederdeel of heuet vp die zuitside Ende willem [vorseit] die nortside alle jare te betalen die ene helft vp sente martiins dach in [] Ende die ander helft vp sente peters dach inghaende lenten Ende tote desen dach voerseit te betalen met gelde jof met panden alse recht es van erfrenten [Ende] [met] desen brief es ghedoet een ander brief die ghemaket was van desen seluen renten Ende vp dese selue daghe jnt jaer van achtenvinteghen vp sente matthiis avent
</main>
<end>
Ende omdat dit waer es Ende vast sel bliuen soe hebbe wi scepene voerghenoemt desen brief besegelt met onsen seghelen Ghegheuen des donres dages voer sente jansdach te midsoemere int jaer ons heren m ccc ende drie ende viertich
</end>