Compilatiecorpus Historisch Nederlands 1.0 (CHN): ambtelijke teksten 1250-1800: gouda_1363_1

<begin>
WJ Willem heynnen soen Jan Claes soen Ende Claes die breede scepen binnen der Goude orconden ende kennen
</begin>
<main>
dat quam voer ons jan Ruische ende lyede dat hi scoudich es jacob cupers drie kinderen jan willem ende symon vijf pont hollants buerse ghelt jaers an Rentten Eeweliken durende op zijn huus Ende erue dat hi staende heeft op die ghoude ende beleghen hebben met erue jacob van ghinckel op die west zyde Ende Reynwart op die oest zide Ende dese voerscreven rentten zel hi betalen alle jaer die een helft op alre heylighen dach Ende die ander helft opten meyedach met ghelde of met panden alse recht es van erfrentten Ende hier mede soe es ghedoet enen scepen brief die ghemaect was jnden jare van achte ende vijftyghen des donre daghes na sinte willebroerdus dach
</main>
<end>
Jnkennessen der waerheyt soe hebben wi scepene voerscreven desen brief bezeghelt met onsen zeghelen Ghegheuen des manen daghes na sintte panckraes dach Jnt jaer ons theren m ccc drie ende tsestich
</end>