Compilatiecorpus Historisch Nederlands 1.0 (CHN): ambtelijke teksten 1250-1800: gouda_1383_1

<begin>
WJ Costiin Jelijs soen Jan dyrxs soen Ende dyrc kerstants soen Scepene binnen der goude orkonden ende kennen
</begin>
<main>
dat quam voer ons Jan pieters soen Ende lyede dat hi sculdich Js alyden pieter die Rams wedue veertich scellinghe hollants buerzeghelts tsiaers an Renten Ewelike duerende op Siin hws ende erve ende op dat erve over die [waterganc] after ziin hws ende erve ter nuwer hauen wart an alse als hijd nv ter tijd bewoent In hontscoep Ende beleghen hebben met erven in hontscoop Jacob claes soen an die westzide Ende Jacob Dirxs soen an die oestzide Ende Coman Roelof op die nuwe hauen an die oestzide Ende Willam Jans soen andie westzide alle Jaer te betalen op Sente Jans dach te midde zomer met ghelde of met panden alse Recht js van Erfrenten
</main>
<end>
In kennessen der Waerheit bezeghelt met onsen zeghele Ghegheven op Sente Jans dach te midde zomer Jnt Jaer ons heren m ccc drie ende thachtich
</end>