Compilatiecorpus Historisch Nederlands 1.0 (CHN): ambtelijke teksten 1250-1800: gouda_1383_3

<begin>
Wj jan dyrcx soen dyrc kerstants soen Ende jacob jans soen Scepen binnen der goude orkonden ende kennen
</begin>
<main>
dat quam voer ons willam vredericx soen Ende lyede dat hi sculdich js dyrc paencras soen achte scellinghe hollants buerzeghelts tsiaers an Renten Eewelike duerende op die oestzide vanden haluen hwse ende erve dat hi nv ter tijd bewoent jn tevencoep Ende beleghen hebben met erven lysbet kerstants wedue an die oestzide Ende willam vredericx soen selue metten weder deel vanden hwse andie westzide alle jaer te betalen tot voerscotenremarct met ghelde of met panden alse Recht js van Erfrenten Ende met desen brieue So is ghedoot enen ouden scepenen brief van Een pont hollants buerseghelts sprekende op dit voerseyde half hws ende erve an jaerlixen Renten die ghemaect was jnt jaer ons heren m ccc Ses ende tsestich op Sente victoers dach also dat dese brief macht hebben sel vanden datum voerseit
</main>
<end>
jnkennessen der waerheit beseghelt met onsen zeghele Ghegheven op Sente mychiels dach jnt jaer ons heren m ccc drie ende thachtich
</end>