Compilatiecorpus Historisch Nederlands 1.0 (CHN): ambtelijke teksten 1250-1800: gouda_1394_2

<begin>
Wij Scoud borghermeysters Scepe Rottier, Martinene Ende Raed Derstede van der goude Doen Cond allen luden
</begin>
<main>
Dat voer ons quam aernd pic Dijrcx soen Ende lyede dat hi ghegheuen heeft [pwrlic] om goeds willen ter armer behoef die beziect siin mitter lazeryen dat hws ende erve mit al sinen toe behoren dat hi legghende heeft buten des porters poerthws naest Pieters van der moeren westwaerts in deser manieren alse wat beziecte Jnt voerseyde hws gheset worden omme daer mitter woen te bliuen die sellen alle die ander beziecte die Jnt gasthws comen Ende die om goeds willen begheren herberghe te Rusten doen na haren vermoghen also verre alser beddinghe siin ende hwsinghe bi goetdunken den heijlijghegeestmeysters Voort waer dat sake datter enighe beziecte also ziec daerin worden dat zi te bedde bleuen legghen Ende zi niet en hadden te verteeren So soud men hem haer noedtorft doen van des voerseiden hwse goede also vorre alset daer waer Oec waer dat sake datter enighe beziecte in quame Ende daer storven So wes zi daer in brochten dat sel daerin bliuen ter armer behoef Voort So sullen die ghene die Jnt hws gheset worden om daer Jn te bliuen mitter woen alle cleynoud bewaren in waschen in droghen Ende in anderen dinghen daert voerseyde hws af behoeffelic es Ende daer Reden in staet Ende wat cleynoud hem gheleuert wart dat sellen zi weder ouerleueren ende bewijsinghe af doen wtgeset dat arch van oude Ende om dat Een yghelic mensche sculdich es te vorderen alle saken daer goeds dienst in ghemeerret moghen wesen dat aen ghesien So hebben wij Scoud borghermeysters Scepene Ende Raed voerseit wt vriendeliken verzoec aernd picx voerseit hem gheloeft ende ghelouen van onser stede weghen dat wij den heijlijghegheestmeijsters die nv siin of namaels wesen sellen dit voorseyde hws sullen doen bewaren Ende beuelent hem te bewonen nader manieren voerscreuen also vorre als thws goede streckt wtghenomen dat aernd pic voerscreuen bi des heijlygen gheestmeijsters Rade dit voerseide hws bewonen sel also langhe als hi leuet Ende teynden siinre doot So selt comen tebewaren an die heylyghe geestmeysters in allen manieren alse voerseit is ter armer behoef alle dinc sonder arghelist
</main>
<end>
Jnkennessen der waerheyt So hebben wij Scoud borghermeysters Scepene Ende Raed voerseit desen brief beseghelt mit onser stede seghel Ghegheuen des woensdaghes na Sinte lucyen dach Jnt Jaer ons heren M ccc vier Ende tneghentich
</end>