Compilatiecorpus Historisch Nederlands 1.0 (CHN): ambtelijke teksten 1250-1800: gouda_1413_1

<begin>
Scoud burghermeysters scepene ende raet der stede van der Goude doen cond allen luden
</begin>
<main>
dat wy by consent ende goetduncken onser ghemeenre vroescap van der stede tot eren Goeds gheoorloft ende ghemachticht hebben van der stede weghen den zusteren van Sinte Margareten oorde ter Goude die wy onder onse bescermenesse ghenomen hebben opdat zy te sekerliken ende te vredeliken in enen reynen oedmoedigen leven staende moghen bliven dat zy moghen kyesen alle jaer by der meyster stemmen der susteren voorsz drie goede knapen van onsen poorteren dierre nut ende oerbaer toe zijn ende gaerne der zusteren dienst doen willen dat die machtich zullen wesen alle jaer hoer renten die zy hebben jaerlicx op te bueren ende te ontfanghen toter zusteren behoef ende recht daerof te pleghen ende te verandwoorden ghelikerwijs of zyd selver waren of een ygheliken van hen drien bysonder opdats hen die ander twe ghewaert doen so waer ende in wat manieren die zusteren des behoeven ende daer recht of te doen ghelikerwijs als men die Goodshuusmeysters ende die gasthuusmeysters recht doet vant Goodshuusgoede ende vant gasthuusgoede so sellen dese drien goede knapen den zusteren goede rekeninge doen twewarven des jaers opdat zyd an hemluden begheren Voert sellen zy den zusteren ghehulpich ende bystandich wesen in allen zaken dien den zusteren aendraghen mach by haer consent ende vijf sinnen na horen vermoghen Des so sellen die zusteren alle jaer na den Derthienden dach als men nuwe dienstlude kiest ende set ende gheven in scrift den gherecht dese drie goede knapen alle jaer die zy ghecoren hebben by der meyster stemmen die hem nut ende oerbaer dinct wesen ende die drien goede knapen sel die scoudt mitten gherecht eden dese voersz zaken te regieren na inhoud des briefs dit jaer lanc also langhe als ALS zyd gaerne doen willen ende nyement daertoe te dwinghen of te ghebieden
</main>
<end>
Alle dese voersz punten zullen staen tot wedersegghen der goeder luden van der stede alle dinc zonder arghelist ende want wy hem dit gheconsenteert hebben als voorsz staet so hebben wy hem desen brief daerop ghegeven bezeghelt mit onser stede zeghel hieran ghehangen Ghegeven op Onser Vrouwendach conceptio int jaer ons Heren MCCCC ende derthien
</end>