Compilatiecorpus Historisch Nederlands 1.0 (CHN): ambtelijke teksten 1250-1800: gouda_1413_2

<begin>
Scoud borghermeysters scepene ende raet der stede van der Goude doen cond allen luden
</begin>
<main>
hoe dat heer Jan die bastaert van Bloys heer van Treslon ende mijn vrou van Treslon zijn ghesellinne mit goeden voorsien ter eren Goods ende onser Liever Vrouwen om Goods dienst daermede te doen ghegeven hebben ende gheven de heylige prochykerc ter Goude tot enen testament Item drie cappen van frueel een casufel van frueel mit alven mitten stolen als daertoe horen ende twe rocken van frueel Item so hebben zy noch ghegeven der heyliger kerken voorsz vierdalven morghen lands die ghelegen zijn int lant van den Steyn in dat weer daer Jan Pietersz weduwe nu ter tijd op woent vry van scote van lote ende van allen zaken dat ter heerlicheyt aendraghen mach uutgheset dijck- bannewercende sluusghelt den voorsz lande toebehorende Ende hiervoer so sellen die heylighe kercmeysters die nu zijn of namels wesen zullen doen doen op der heylicher kerken cost tot ewyghen daghen alle maende een vyghely des avonds ende een misse van requiem des morghens mit IIII tortysen belicht tot horen grave op enen dach in elker maent die heren jan ende mijn vrou kyesen also langhe als ALS zy leven ende na hoeren doot hoer erfnamen kiesen ende die priesters mitten clerken zullen alle tijd als ALS die vyghely ghedaen is ende als die misse ghedaen is gaen ten grave voorsz ende daer lesen een salm of twe salm mitten collecten als dat behoort Ende waert dat men in enighen van desen punten versumende waer ende volcomeliken niet en dede als voorsz is so moghen heer Jan of mijn vrouwe voorsz of hoer erfnamen na hoerre doet weder na hem nemen dese voorsz vierdalven morghen lands onverseyt van yement ende daermede hoer wille doen zonder enich arghelist
</main>
<end>
In kennisse der waerheyt so hebben wy by goetduncken der vroescap van der stede hierop ghegheven desen brief bezeghelt mit onser stede zeghel op Sinte Barbarendach int jaer ons Heren MCCCC ende derthien
</end>