Compilatiecorpus Historisch Nederlands 1.0 (CHN): ambtelijke teksten 1250-1800: gouda_1413_3

<begin>
Scoud borghemeysters scepene ende raet der stede van der Goude doen cond allen luden
</begin>
<main>
dat wy verpacht hebben van onser stede weghen by goetduncken onser vroedscap Claes heren Jacobs soen van der Goude onser stede vesten tusschen der stenen brugghe ende des Cleywechs poorthuus vijff ende twintich jaer lanc duerende na Onser Vrouwedaghe te lichtmisse naestcomende in deser vorwaerden dat hy dese vesten sel bruken zijn gaern op te spinnen ende zijn touwe op te slaen ende mach loodzen an die muer nederwaerts ses roedevoete wijd ende xxv roede lanc ende die vesten beneden sel hy bruken tot half die slote toe ende dese vesten allanghes beneden mach hy bepoten also datter enen goeden ganc mach bliven tusschen die loodze ende die poten ende hy en sel gheen steghen die opgaen an die vesten beheynen noch betimmeren
Voort so sel hy bruken ende bezyghen dat houten harkier naest der stenen brugghe dese jare uut mer des so sel hyd houde op zinen cost in rake ende in dake onder der scepen scouwe Ende van deser vesten ende harkier voorsz so sel hy jaerlicx gheven der stede voorsz twintich scellingen Hollants buerzegelt te betalen die een helft alle jaer op den Meyedach ende dander helft op Alreheylighendach mit ghelde of mit panden also recht is van der stede goet ende dese vesten ende harkier en sel hy norghent arghen noch meynen dese jaren voorsz Ende waer dat zake dat die stede last op quame dat God verbieden moet so mach der stede dit harkier die vesten ende die timmeringe als op dese vesten staet bruken ende bezyghen onverseyt van hem of van yement Ende wes scade men hem dan doet an zijn timmeringe ende potinge dat zal men hem beteren bi den gherecht ende die tijd lanc so en sel Claes noch zijn nacomelingen ghenen pacht gheven alle dinc zonder arghelist
</main>
<end>
In kennisse der waerheyt so hebben wy hem desen brief daerop ghegeven bezegelt mit onser stede zeghel op Sinte Steffensdach int jaer ons Heren MCCCC ende derthien
</end>