Compilatiecorpus Historisch Nederlands 1.0 (CHN): ambtelijke teksten 1250-1800: gouda_1415_1

<begin>
I Scoud borghermeysters scepene ende raed der stede van der Goude doen cond allen luden
</begin>
<main>
dat wy overdraghen zijn mit meyster Meeus Dyrcxsoen onsen poorter by goeduncken ende consent onser vroescap van der stede voersz ende hebben meyster Meeus aenghenomen te wesen der stede wercman ende te bezorghen alle timmerwerc toebehorende der stede voorsz als oud werc of nuwe werc ende niet uutghezet ende dat zel wesen ende dueren tot meyster Meeus voorsz live toe ten waer van meyster Meeus voorsz ouderdom of van onghehoorzamicheyt of dat hy der stede werc niet also en bezorchde dat men hem wel mit reden verlaten zoude moghen ende dat zoude wesen bi der meyster stemmen van der vroescap Ende oec uutghezet alle noetzaken die meyster Meeus voorsz opcomen moghen in deser manieren als hierna ghescreven staet Item zo zel meyster Meeus eersteliken alle timmerwerc maken dat die stede te maken heeft overal daert te doen is ende dat zel meyster Meeus maken in dachueren ende die stede zel hem daertoe leveren alle stof dat hy daertoe behoeven zel Ende meyster Meeus zel hebben elcx dages IX 1/2 botken gherekent III leewen voor III botken mer meyster Meeus knapen zel men lonen tot alre tijd by goeduncken tgherechts Item als der stede werc alomme eens versien is van des daerop of daeran ghebreect so zelt meyster Meeus voortaen houden ende bezorghen op zijn pensi dat hy jaerlicx van der stede daerof heeft mer die stede zel hem leveren alleweghe stof dat hy daertoe behoeven zal Voort so wanneer die stede nuwe werc zel doen maken so sel meyster Meeus dat werc maken om alsoveel loons als tghemeen gherecht godunct mer wil meyster Meeus dat werc niet also annemen te maken so zel men dan dat werc bestaden te maken om den minsten penninc mer meyster Meeus zel een bezorgher wesen van den werc voorsz tot alre tijd op zijn dachloon ende dat sel men segghen openbaerlic als men mitten werc te bode zel sitten of men macht meyster Meeus laten maken mit zinen knapen op horen dachloon als voorsz is
2. Voort als men te velde leyt in oorloge mit onsen ghenadighen heer van Hollant of waer wy dat te doen moghen hebben so zel meyster Meeus mede trecken mit enen knecht op zijn dachloon elcx als voorsz is ende meyster Meeus zel dan doen mit zyne knecht so wes die stede te doen heeft na horen vermoghen ende die stede dat te doen heeft Voort so zel meyster Meeus alle der stede agynen die zy nu heeft of namels cryghen mach ende al der stede koken desghclijcx niet uutghezet dat zel meyster Meeus bewaren ende regieren als dat behoort mer men zelt meyster Meeus in scrift overgheven ende meyster Meeus zalt jaerlicx te Midvasten weder bewysen den gherecht van jaer te jare na inhoud der sedelen die daerof zijn ende hy selver daer een ? of heeft Voort so en zel hem meyster Meeus norghent verbinden enich werc te maken tenzy by consent van den gherecht Voort so sel men op dat een eynde van der vleyshalle een kamer afmetsen daer men der stede werc voorsz in besluten mach Item zo zel meyster Meeus jaerlicx hebben voor zijn pensi van den werc voorsz van der stede voorghenoemt VIII lb Hollants buerzeghelt ende voor zijn cleder alle jaer drie oude vrancken te betalen alle jaer die drie oude vrancken binnen Meyesmaent ende die VIII lb voorsz alle jaer op Sinte Maertendach in den winter ende Meeus zel zijn cleder doen maken mitten ghelde voorsz over dat oude jaer ten minsten als redelic is daer hy ende die stede eer of moghen hebben alle dinc zonder arch of list
</main>
<end>
In kennesse der waerheyt so hebben wy onser stede zegel hieran ghehangen Ghegeven op den XXIIII dach in Aprille int jaer ons Heren MCCCC ende vijfthien
</end>