Compilatiecorpus Historisch Nederlands 1.0 (CHN): ambtelijke teksten 1250-1800: gouda_1415_2

<begin>
Scout burgemeesters scepene ende raed der stede van der Goude doen kont allen luden
</begin>
<main>
dat onse kerckmeesters by goeduncken van ons ende van onser vroescap overdragen sijn mit meester Jan die Goutsmit dat is te weten dat meester Jan voirsz aengenomen heeft sijn leven lancq te spoelen op onse grote oirgelen in onser kerck alle hoechtiden als behoirlic is in die vesper ende in der missen ende hy sel onse orgelen houden ende bewaren op hair stellinge op sijn sorge ende wes dairaen mach gebreken dat sel hy maken of doen maken sonder loon mer des sel men hem leveren alle stof dat hy dairtoe behoeven sel Voirt sijnt voirwairden wair dat sake dat meester Jan voirsz hem kennelic versumede an dit voirsz werck ende an sijn dienst of an anderen onredeliken saken also dat onse scout tgemeen gerecht ende die vroescap by der meester stemmen dochten dat hy hem versumede ende ons niet nut en wair so mach men hem desen dienst wederseggen ende dese brief sel dan doot wesen ende niet houden mer hy sel verbonden wesen an desen dienst al sijn leven lancq sonder wederseggen uutgeset nootsaken van dootslagen of van anderen kenneliken ongeval dat hem opcomen mach daer God verhoeden moet Ende van desen dienst so sellen hem onse kerckmeesters elcx in sijnre tyde alle jair uutreyken ende betalen van onser kercken goede viertich pont Hollants buersegelts gerekent vijfthyen Hollantsche leeuwen voir elc pont alle jair te betalen die een helft op Sinte Jacobsdach apostel ende die ander helft op Onser Vrouwendach te lichtmisse dair naestcomende van jaire te jaren Voirt so sel hy hyer binnen wonen sijn leven lancq ende sel vry sitten van scote van waken ende van exsinsse van sinen bier dat hy binnen sinen huse drinct mit sijn selfs gesin ende voirt van allen ongelde sonder argelist Voirt so sellen hem die burgermeesters alle jair sceyncken op den heylygen Kerssavondt twee cleyn canne wijns gelikerwijs als men jairlix doet die scepenen ende ander dieners Alle dinc sonder arch of list
</main>
<end>
In kennesse der waerheyt so hebben wy hem desen brief dairop gegeven bezegelt mit onser stede zegel hier angehangen Gegeven op Sinte Thomasavondt apostel int jaer ons Heren MCCCC ende vijfthyen
</end>