Compilatiecorpus Historisch Nederlands 1.0 (CHN): ambtelijke teksten 1250-1800: gouda_1416_1

<begin>
Scoud burgermeesters scepenen ende raed der stede van der Goude doen kond ende kenlic allen dengenen die desen brief sullen sien of horen lesen
</begin>
<main>
dat wy overdragen sijn by consent ende goeduncken der gemeenre vroescap van der Goude ende hebben vercoft heren Jan die bastaert van Bloys heer van Treslong ses ende dertich gouden nobels tsyaers eweliken durende munte coninc Edewairts van Yngeland die voir dese tijd geslagen ende zwaer genoech van gewichte sijn of ander gouden gelt dairvoir dair men se om copen sal mogen van welcken ses ende dertich nobelen tsyaers here Jan voirsz ons totter stede behoef voirsz wael voldaen ende betaelt heeft den lesten penninc mitten eersten dair wy mitten selven gelde rechtevoirt weder mede gelossent ende gecoft hebben tegen Harman Bylevelt Harman Zassensoen twintich Eyngelscher nobels erflike renten tsyaers die hy op der stede van der Goude hadde ende sestyen nobels tsyaers die onse poirters binnen onser stede op der stede voirsz hadden dair Harman Bylevelt ende onse poirteren voirsz ons hair brieven of overgegeven hebben ende rechtevoirt gecanseleert ende gedoot hebben Ende want here Jan voirsz dese voirsz ses ende dertich nobels tsyaers geordineert ende gemaect heeft in rechten testamente voir hem ende vrouwe Maryen van Heemstede vrouwe van Treslong sijn getrouwe wijf tot enen outair dat hy gesticht heeft in der prochykercke ter Goude mit eenre misse dagelix dairop te doen opdatter den dienst Goids mede gemeeret ende die gemeen stede mede gedient sal worden ende so wes gelt dair overblijft tenden die dagelixe misse voirsz so die bestaedt is te doen te deylen den armen huussitten ende beddevasten die binnen der stede voirsz sijn opdat sy te bet gelaeft ende getroest sullen worden nae inhoud der brieven die de Heylige Geest ter Goude van heren Jan voirsz dairof heeft so sullen wy hem dairom van der stede wegen van der Goude sulke gracie gedaen ende geconsenteert mit desen brieve so wanneer die burgermeesters van der Goude of andere der stede dienres die tot eniger tijd hierna dairtoe geset sullen worden der stede goede van der Goude te verhuyren dat dan die Heylige Geestmeesters ter Goude die nu sijn of namels wesen sullen tot behoef des Heylich Geests ter Goude die heren Jan voirsz dese ses ende dertich nobels tsyaers mit sinen brieven gegeven ende gemaect heeft dairby wesen sullen van jaire te jare om gelooft self te nemen van dengenen die der stede goeden huyeren dair sy menen an bewaert te wesen totter somme van den ses ende dertich nobelen toe voirnoemt uut wat goede dat sy willen der stede toebehorende onverseyt van ons of van yement anders Ende dese ses ende dertich nobels sullen die Heylige Geestmeesters voirseyt ontfaen alle jair tot sulcken dagen als van der stede goede voirsz geset sijn of geset sullen worden Ende die Heylige Geestmeesters voirsz sullen hebben van horen gelde voirsz sulc recht of sijs behoefden als men den burgermeesters ter Goude selve dairof doen sal sonder arch ende list Ende want wy dit vast ende stede houden willen voir ons ende onsen nacomelingen so hebben wy gelooft heren Jan voirgenoemt vrouwe Maryen van Heemsteden vrouwe van Treslong haren erfgenamen ende den Heylige Geestmeesters voirgenoemt in allen punten te houden ende te staecken tot ewigen dagen nae ingehoudt des briefs die de Heylige Geest ter Goude van heren Jan voirgenoemt dairof heeft
</main>
<end>
In kennesse der wairheyt so hebben wy onser stede zegel hieran gehangen Gegeven op den XXVIsten dach in Marte int jair ons Heren MCCCC ende sestyen
</end>