Compilatiecorpus Historisch Nederlands 1.0 (CHN): ambtelijke teksten 1250-1800: gouda_1416_2

<begin>
Int jaer XIIIIc ende XVI des Saterdages na Sinte Katherinendach doe sprac Jan van Heteren als baeliu Pieter Claeszoen an in de vierscaer ter Goude voer scepen ende seyde
</begin>
<main>
hoe dat hem in voerleden tyden der stede verboden was op sijn lijf ende boven dat inghecomen was binnen der stede buten consent van den heer of van der stede ende hadde met ghewelt een doer opghestoten ende potten ende ketelen mit cracht ondtween ghesteken ende dat ghelyet hadde voer scepen onghevangen ende onghebonden ende daeraen verbuert hadde sijn lijf ende sijn goet ende woude hy daer yet wederseggen des woude hi mit hem gaen an scepen ende seyde dat hi sculdich waer mit hem te gaen an scepen of an al sinen woerde te lyen Des Pieter daerteghen dingde ende seyde dat hi des ondsculdich waer ende hem die aenspraec niet deren en soude ende waer dat sake dat hem die stede verboden was dat was op sijn lijf ende niet op zijn goet ende soe wye den anderen hogher aenspreect dan hi hem verbonden heeft dat hi daeraf vry ende quuijd wesen sel Ende oec mede binnen der vryheyt niet ghevanghen en wordt mer ghevanghen lach in Scyelant ende van daen mit craft ende mit ghevelt hier ghebracht is Ende bi alle dese redene vry ende quuijd wesen sel van dese aenspraec Ende soe hi hem scepen biet des gaet hi mit hem an scepen ende ghewijst word an die vroedscap ende zy dat voert wijsden an die van Leyden des die van Leyden uutgaven den baeliu die kenninge ghewonnen ende Pieter verloren ende Pieter wordt ondhooft op den XIIIden Avond op een Dincxdach voer de halle int jaer XIIIIc ende XVII God hebbe zijn ziel
</main>
<end>
Scepens Floris Dyrcxz Pieter Voppensz Hughe Lyclaesz Gherit Rycoud Godevaert Dyrcxz Franseys Heyensz Dyrc van Elten
Scoud Costijn Gelysz
Burgemeesters Jan die Bruun Frederic Gheritsz
</end>