Compilatiecorpus Historisch Nederlands 1.0 (CHN): ambtelijke teksten 1250-1800: gouda_1427_1

<begin>
Dit is die kuer van den vreden ter Goude gekuert ende gemaect op Sinte Jansdach in die Kersheylichdagen int jair XIIIIc zeven ende twintich
1. Wy scoud borgermeesters scepenen ende raed der stede van der Goude doen cond allen luden
</begin>
<main>
dat wy by rade der gemeenre vroescap van der stede hebben aengesien om nutscap ende orbair also van ouden tiden gewoenlic heeft geweest dat men alle vreden plecht te vernuwen mitten scoud ende scepenen voir der lude doren dair sy woenachtich sijn ende om te verhoeden gebreke die in veel manyeren dairin vallen mogen so hebben wy eendrachtelic gecuert dat die oude manyer off ende te niet wesen sal mer dat men voirtan alle vreden vernuwen sal tot vier tiden van den jair dat sal wesen des dages na Jairsdach des dages na Beloken Paeschdach des dages na Sinte Jacobsdach ende des dages na Sinte Martijnsdach in den winter Ende so wye op enich van desen dagen enen vrede begeert die sal comen in der stede huus voirmiddage voir den scoud ende scepenen die dairover sitten sullen ende begeren dair enen vrede ende sel dat rechtevoirt den clerc laten teykenen jegen wye hy die vrede begeert ende dat sal men scriven also dat hy dairmede bewairt is welke vreden men kondigen sal des aftermiddages van der stede huus openbairlic mitter clocke dat is te verstaen dat tgerecht des aftermiddages die brantclocke sellen doen slaen an die een side tot drien posen ende als die laetste reys geslagen is so sal men die vreden offlesen als voirsz is Ende die vreden sullen dueren totten naisten vredach toe die dach al ende tot des anderen dages ter sonnen opganc Ende dairmede sel een ygelic bevreet wesen wye hierenboven die vrede braeck die verbuerde sijn lijff ende sijn goet
2. Item so wye dat na der clocke enen vrede begeert welke vrede hy sculdich was te vermanen voir die clocke dair sel die scout mitten scepenen mede gaen ende doen hem enen vrede hebben dair hyd begeert ende dairoff sal hy den scout ende den scepenen geven voir horen ganc ende omdat hy niet te tide en quam IIII sc
3. Item so wye een vrede doet inscriven off maken als voirsz staet ende geen poirter ter Goude en is die sal den clerc van elken vrede geven een half oudt botgen ende wye poirter ter Goude is die sal den clerc niet geven
</main>
<end>
Nota
Als men dese vreden offgelesen heeft so seyt die scoud dairop dese vreden also hier gelesen sien die gebiede ic van mijns heren wegen etc enen ygeliken te houden op sijn lijff ende op sijn goet
</end>