Compilatiecorpus Historisch Nederlands 1.0 (CHN): ambtelijke teksten 1250-1800: gouda_1465_8

<begin>
1. Item te weten
</begin>
<main>
dat die van den lande van Steyn gedinget moeten hebben voir twalef uren Item dat die van den lande van Steyn overgegeven hebben dat men die poirteren van der Goude alsulck recht doen souden als men hemluyden alhier in der stede van der Goude doet
2. Voirt soe zijn die schout mit die goede luyden van den gerechte by consent van der vroescap aen een zyde ende die van den lande van Steyn ter ander zyden mit malcander overdragen ende gesloten wair dat saecke dat die bailiu of scout van der Goude enige personen verwonnen hadde dat zy die souden mogen vangen in de lande van Steyn Item desgelicx soe soude die scout van den lande van Steyn dieghene die hy verwonnen hadde binnen die lande van Steyn mogen vervolghen binnen die stede van der Goude ende vangen Ende ist byalsoe dat die scout van den lande van Steyn niet starck genoech en is soe sal hy mogen toespreken die scout ofte zijn gesworen knechten van der stede van der Goude dat se hem bystandicheit doen ende in zijn vangenisse legge ter tijt toe want hy voldaen is van sijn bruecken ende des soe sal die scout van der Goude halff die boeten hebben Voirt soe sal hy die boeten halff hebben van dieghene die hy den scout van den lande van Steyn uutrecht
</main>
<end>
</end>