Compilatiecorpus Historisch Nederlands 1.0 (CHN): ambtelijke teksten 1250-1800: gouda_1473_2

<begin>
Item het is overdragen mitter gemeender vroesscap ende doen gebieden
</begin>
<main>
dat alle dieghene die geschil off gekijff ende diergelijcke hebben ofte gecrygen mochten het wair gevecht off anders ende daer geen openbaere quetsinge en geschiede ende dair vrede gemaect wort soe sullen dieghene die de vrede nemen hem terstont gebieden in te leggen drie dagen lanck ende niet langer Ende indien zy binnen die drie dagen niet en soenen zoe zullen die partien dan gehouden wesen dat den gerechte aen te bringen up een boeten van veertich scellinck Ende dan zoe zullen dat gerechte hem zoenen Ende wair dat sake dat er enich gekijff off gevecht ware ende oft geboerde datter bloetstordinge ofte quetsinge geviele sonder leemte off dootslach dair vrede off gemaect worde dieghene die de vrede nemen die zullen gehouden wesen hem terstondt bieden in te leggen off in te setten XIIII dagen lanck up een boeten van veertich scellinck Ende alle die vreden die men leyt off neempt die sa men den schout terstont aenbringen off des anderen dages binnen dage sonneschijn up die boeten van drie pont Ende indien sy binnen XIIII dagen niet en soenen soe sal dat gerechte hem soenen ende die partien sellen dat terstondt aenbringen als die XIIII dagen omme gecomen sijn up een boeten van veertich scellinck Ende van alle soenen die dat gerechte maken dairoff sal hebben den heer XII scellinck ende dat gerechte XII scellinck Ende alle gevecht twist off geschil dat by nacht geschiet sullen die partien dat terstont dat gerechte aenbringen dair vrede off gemaect wordt
</end>