Compilatiecorpus Historisch Nederlands 1.0 (CHN): ambtelijke teksten 1250-1800: gouda_1482_1

<begin>
Die scout mit die goede luden van den gerecht ende mitter gemeenre vroetscap sijn overdragen
</begin>
<main>
tot wat tiden dat men die vroetscap tsamen hebben wil dat men dan elke vroetscap bysonder die weet doen sal mit een stede bode tsavons tevoren tot synen huse ende men sal des anders dages tsmorgens te VIII uren die clock luyen een half ure an malcander ende soe wie van der vroetscap te negendalven upter stede huus niet en wair die soude verbueren drie stuvers alsoe dicke als hy niet en quame Ende indien hy onwillich was in die voirsz boeten te betalen men sal dan terstont die pande uten huus doen halen mit de scoutendieneren behoudelic die sieck of van huus sijn die en sullen niet sculdich wesen in den voirsz boeten Ende soe wie van den gerechte bruekich viele ende niet en quame als voirsz staet die soude dubbelde boeten gelden behoudelic dat die scout voir elke brueke twee placken nederleggen sal ende drie stuvers weder inwinnen
</main>
<end>
Actum den VIIIen dach in Meye anno LXXXII
</end>