Compilatiecorpus Historisch Nederlands 1.0 (CHN): ambtelijke teksten 1250-1800: gouda_1489_1

<begin>
Upten eersten dach van Januario anno LXXXIX soe worde by de veertich uter vroesscap ende rijcdom van der stede geordonneert ende overdragen
</begin>
<main>
als die XXII upte selve tijt gecoren waren dat men voertan als die nyeuwe burgermeesteren gemaect worden ende horen eede gedaen zullen hebben dat zy dan van stonden an loeten off werpen zullen mit taerlinghen soe wie van die vieren dat eerste quartier jairs der stede dienen sal int reysen ende die dachvaerden van der stede wegen te bewaren als die gebeuren zullen Ende soe wordt elcke van den vier burgermeesteren zijn quartier jaers als dat hem elck byzonder vallen sal mitter loete off by meesten ogen van taerlingen Ende of enige burgermeester diet zijn buert waer ende nootelicken te doen hadde off by ziecten off gebreken niet reysen en mochte soe sal hy dan gehouden wesen een ander te willigen een van zijn medegesellen off andere van den gerechte ofte ymmers van den vroesscap nut ende bequaem dairtoe wesende by goetduncken van den gerechte
</main>
<end>
</end>