Compilatiecorpus Historisch Nederlands 1.0 (CHN): ambtelijke teksten 1250-1800: gouda_1493_3

<begin>
Upten XXIIIen dach in April anno XCIII soe was geaccordeert ende overdragen by der vroesscap
</begin>
<main>
als dat men van nu voirtan tot vier termynen tsjaers uutgaende recht doen sal van alle sculden te uten ende te scatten na den rechte van der stede te weten vier warven tsjaers in deselffde vierthien dagen als men van ouden gewoenten van poirtpande recht doet dat men alsdan binnen de XIIII daghen oick van alle sculden hoe die genoemt mogen wesen uutgaende recht doen sal van scatten ende anders Behoudelicken dat men telken binnen die voirscreven XIIII dagen anders gheen recht en sal doen dan van poirtpande na ouder gewoenten van strickcedelen ende vreemde luyden ende voirt van alle andere sculden uutgaende recht te doen van panden ende scatten als voersz is ende dat na den rechte van der voirn stede 1
</main>
<end>
</end>