Compilatiecorpus Historisch Nederlands 1.0 (CHN): ambtelijke teksten 1250-1800: gouda_1497_1

<begin>
Upten lesten dach van Octobri anno XCVII soe was bi der ghemeen vroesscap overdraghen
</begin>
<main>
dat nyemant voortan zijn eyghen husen staende binnen der vriheyt van der stede sal moghen offbreken ende te nyete maken noch oic beroeven of vervreemden van eenighe steen houtwerck yserwerck off anders dat totten huysse behoort om in wesen te bliven upte verbuernisse ende boeten van thien gouden croonen ende de correctie van der stede Ende bovendien die renten die upten selven huse spreecken te versekeren up eenighe andere huyssen off erven in der stede om also die huyssen ende renten tonderhouden ende in weesen te laten bliven
</main>
<end>
Actum ut supra
</end>