Compilatiecorpus Historisch Nederlands 1.0 (CHN): ambtelijke teksten 1250-1800: gouda_1509_1

<begin>
</begin>
<main>
1. Voort is overdragen dat alle uutdragers of uutdraechsters die dagelicx uutdraeghen ende eenigerhande clederen imbool huysraet ende anders vercopen daer zullen zij slachgelt ofgeven alsoe dickwils alst vervreemdt of vercoft wordt
2. Item angaende vant gaern linnelaecken ende wollelaecken te weten want gaern om selfs laecken daerof te reeden zullen zy mogen copen sonder yet daerof te geven mar waert dat zyt coften om weder te vercopen daer sullen zy slachgelt of geven
3. Item soe wat linnen of wolle laecken die zy copen by gheheele laeckenen zullen zy weder mogen vercopen sonder slachgelt te geven Mar waert byalzoo dat se eenige lappen of sticken coften om weder te vercopen daer zullen zy slachgelt of geven
4. Voort als die pachters vant slachgelt comen ten huse van den uwtdraechsters soe zullen die uwtdragers of uwtdraechsters gehouden wesen tzelfde den pachters by hoeren eede an te brengen ende te seggen van alle tgundt dat zy van die weeck vercoft hebben ende daer betalinge van doen ende dit upte boeten voirsz
</main>
<end>
Actum den IIII Junii anno IX
</end>