Compilatiecorpus Historisch Nederlands 1.0 (CHN): ambtelijke teksten 1250-1800: gouda_1511_1

<begin>
Upten IIIen dach in Decembri anno XVCXI is by der gemeen vroetscap geordonneert overgedragen gesloeten ende gheconsenteert
</begin>
<main>
dat om te conserveren ende bewaren deser stede van der Goude soe zijn gemaect ende geordonneert zekere kuer ende ordonnantie om gehouden te worden up peynen ende verbuerten up elcke articul geordonneert
1. Gelderse In den eersten adverteert men alle ingeboeren Geldersschen tzy brouwersknecht ofte andere ambochtsluyden ghehylict ende ongehilict poorters ende geen poorters dat zyluyden tusschen nu ende morgenmiddage comen upten stadthuys by den burgemeesters ende gerechte om gedaen te worden van hemluyden tgundt des alsdan geordonneert zal worden
2. Inwoonders Item insgelijcx gebiet men alle inwoenderen die geen poorters en zijn dat die gehouden zullen wesen tusschen nu ende morgenmiddage te comen upter stede huys by den burgemeesters ende tgerechte voirsz om oeck gedaen te worden tgundt des gedaen ende geordonneert zal worden ende dit upte peyn van stonden an nae morgen uuter stede te vertrecken Ende soe wie contrarie dede soude geacht ende angetast worden als viandt
3. Bruloften Voort gebiet men dat soe wanneer eenighe bruloften tusschen dit ende Paesschen gehouden worden soe gebiet men dat men niet verzoucken en moet langes der straeten lopen noch daeromme moet tzy mit singen roupen ofte andersints quaet gelaet te maecken upte verbuerte van een ygelicken die ter contrarie dede die boten van een croen
4. Schutters Voort gebiet men alle scutters oude ende jonghe dat se van stonden an gehouden sullen wesen alle daege te gaene ende te dragen een lanck mes ofte coorde up zyde upte verbuerte van III stuvers Ende de scutters zullen malcander mogen becoeren ende zullen de boeten mit malcander verdrincken Ende wie den heer bekuert zal gehouden wesen den heer de boeten up te leggen
5. Sylen Voort gebiet men alle diegheene die zijllen ofte watergangen hebben duer huer huisen ofte erven lopende in eenige stede waterscappen dat zy zullen gehouden wesen tusschen nu ende Saterdage over achte dagen naestcomende de voirsz zylen ofte watergangen toe te stoppen ofte scotdueren daerin te maecken omt waeter te scutten alst van node wesen zal ende den gerechte belieft ende dit upte verbuerte van ygelick een croen te verbueren alsoe dickwils als yemandt bekuert wordt ende zullen nochtans gehouden wesen de scotdueren te maecken
6. Huysen aen de vesten Voorts gebiet men eenen ygelicken dat alle diegeene zy zijn geestelick ofte waerlick die huysen hebben staen an de vesten rontsomme binnen der stede ende mit weeck dack gedect zijn dat die gehouden zullen wesen de daecken te lemen of off te breecken ende decken mit hart dack tussen nu ende acht werckedagen naestcomende upte boeten van II croenen alle dagen te verbueren alst de acht werckedagen geleeden zijn
7. Schuytevourders Voort gebiet men alle schuytevoerders in der Ijssele vaerende dat zy nyemandt nut eenige scepen en haelen om an lande te setten ten zy dat die scepen besien zijn by dengheenen die daertoe van der stede wegen geordonneert zijn upte boeten van drie stuvers up elcke man of drie weecken te waeter ende te brode upte poort te leggen S Ut supra Voort gebiet men alle andere scuytvoerders dat se nyemandt in der stede van buyten in en brengen mer zullen gehouden wesen de luyden buten der stede te lossenen upte boeten voirsz
</main>
<end>
</end>