Compilatiecorpus Historisch Nederlands 1.0 (CHN): ambtelijke teksten 1250-1800: gouda_1514_1

<begin>
</begin>
<main>
1. In den eersten dat soe wie die vischmarct bedient of verpacht of pairt of deel dairan heeft die en sal gheen visch mogen copen noch mynen noch vercopen noch loten mitte stallen noch paert noch deel hebben mit yemant die visch vercopen opte boeten tot elke reyse van een croen ende die correxie van der stede te weten den heer dat gerechte ende den anbrenger elcx een derdendeel
2. Voirt soe en sullen gheen poirters noch poirtersschen die visch copen of vercopen enige leggers mogen hebben op enige rivieren of opte zee of op enige plaetsen daer men visch vercoept mar alle poirters of poirtersschen sullen selver in persone mogen reysen tot allen plecken dair visch gevangen ende ofgeslagen wort mogen copen ende weder ter Goude ter marct brengen ende doen ofslaen ende zelver mynen mogen op hair pontgelt zonder yemant anders pairt of deel dairan te hebben die visch bruycken opte boeten van drie pont ende die te gaen als voeren telken reyse als zy becoert worden
3. Voirt soe en sal gheen visch langer marct hebben dan hem van de vischvinders geordineert ende gegunt wort opte boeten van een scellinck groit ende die te applicieren als voirscr staet
4. Voirt soe en sal men gheen tonnevisch mogen vercopen noch te weecke leggen dan by consent van den vischvinders elke reyse upte boeten van drie pont ende geappliceert te worden als voir
5. Voirt soe en sel men gheen tonneharinck opslaen noch vercopen dan by consent van de vischvinders Insgelijcx zue en sal men gheenen versschen noch droegen harinck moegen droegen noch bruycken dan by consent van den vischvinders elke reyse opte boeten van een croen die gaen sullen gelijck voirsz is
6. Voirt soe zullen die vinders macht hebben ende auctoriteit een ure te ordineren ende te stellen om den visch of te slaen nae die gelegentheit van den jaere Ende soe wat visch die ofgeslagen is en sal men ter banck nyet mogen bruyken noch vercopen voirdat de clock acht geslegen heeft tenwair datte laetste visch eer ofgeslegen wair soe sal men mogen vercopen voir acht uren Ende dit opte boeten van een croen als voer
7. Noch soe is geordonneert dat gheen scuyten kaeren noch corven mit riviervisch en sullen mogen leggen an eenige waterscepen opte boeten van een croen Ende hiervan sal dat waterscip geven die een helft ten waire dat de scipper hem dat verboden hadde an zijn boort te leggen
8. Voirt dat alle kaeren ende corven die mit visch ter marct gebrocht worden gehouden sullen wesen hoer kaeren of corven opt lant te halen ende te houden leggen nadat sy den laetsten hoep offgeslegen hebben Ende indien sy van hairselfs visch weder mijnden om selver te bruyhen zoe sullen zy die visch gehouden wesen te doen in een leege kaer of corf dair gheen visch in en is
9. Ende die kaer ofte corf sullen zy mogen leggen after hoir stall ende anders gheen opte boeten van ses stuvers tot elken reyse als zy becoert worden ende die stalmeester sal hem oick mogen bekueren als hy visch vint after die vreemde vischmarct die niet ofgeslagen en is
10 Item die vischvinder sullen hebben voir hoeren arbeit ende salaris te weten van een schuyte visch een oertgen van elke tonne visch een oirtgen Item van elke stroe boekijncx een deuyt Item van elke schuyte versschen harinck een groetgen Item van een mande droichde visch dair een tal in is een oertgen ende dairbeneden nae advenant Item van een stoer een groiten Item van een salm een penninck Item van boven XX elften een deuyt Ende van alle groitc waeterscepen dair visch of ael in is een stuver Ende die cleyne schuyten nae advenant
11. Item soe wie desen vismarctexcijs huert die zal gehouden wesen den vreemden man te betaelen ende zijn gelt te geven binnen tvisexcijshuysgen ende die viscopers zullen gehouden wesen den excijsenaers te betaelen hoeren excijs van de visch int excijshuysken ende niet in eenige harbarrigen Ende soe wie broekich bevonden wordt dats upte boeten van een croen
</main>
<end>
</end>