Compilatiecorpus Historisch Nederlands 1.0 (CHN): ambtelijke teksten 1250-1800: gouda_1529_1

<begin>
1. Up den IIIen in Februario anno XXIX is den vroetscop verthoent
</begin>
<main>
dat die van de gerechte met eenigen van den ouden uuyt die vroetscop hebben gelet ende gecommuniceert up die frauden ende fauten die in den exchysen gebeuren Ende omme daerjegens te remedieren dunct hoirluyder goet advijs te wesen up behaegen van den vroetscop dat men ordonneren ende keuren soude geenrehande exchijsbaere goeden te moeten verdraegen vervoeren noch verslepen naedat die zonne onder sal wesen ofte oick voir zonnenupganck ten zy dat men daervan eerst oirloff ende consent of begeert ende gebeden heeft an den exchyseners ofte byalsoe die nyet te vinden en waeren an een van den gerechte mair soude alsdan noch gehouden wesen sanderdaechs tselve den exchysener te kennen te geven voir die noen welverstaende dat upindien een gezwoeren meter int werck waer gegaen binnen sonneschijn omme tcoern te meten die sal moegen zijn werck volbrengen sonder oirloff ofte consent te begeren als voirsz is Ende wye contrarie bevonden wordt gedaen te hebben die sal gelden die boeten van soeveel off hy sonder exchijs goet upgedaen hadde welverstaende dat die voirsz boeten sullen betaelen die tselve goet met der handt updoet ten waer dat hy konde doen blicken dattet tselve hem sulcx belast waerr geweest ende in dien gevalle soe sal diegheene diet heeft doen doen die boeten gelden ende nyet diet gedaen heeft als voirsz is Welcke voirsz advijs ende raminghe van den gerechte met eenigen uuyt die vroetscopt is by die ghemeen vroetscop geapprobeert ende geratifieert sulcx als voirsz is
2. Item is mede den vroetscop verthoent die merckelicken frauden ende gebreeken van de brandewijnexchijs ende omme daerinne te remedieren soe is gesloeten dat men die voirsz brandewijnexchijs sal verhuyeren up condicien dat nyemant brandewijn sal moeten vercoepen dan alleen den pachter offte anderen oirloff eerst van den pachter hebbende Ende wye contrarie bevonden wordt gedaen te hebben sal gelden die boeten van zoeveel off hy brandewijn sonder exchijs opgedaen hadde
3. Item is die vroetscop mede verthoent dat men die meelexchijs nyet en heeft verpacht soe die nyet genouch gelden en mochte waeromme men begeert tadvijs van de vroetscop hoe dat men daerinne sal doen hetzy omme die noch te verpachten ofte te doen bewaeren ofte die geheel off te stellen ofte omme den armen die meelexchijs van den rogge off te stellen ende byalsoe die stede den voirsz exchijs aen haerselven wil houden by wyens men die sal laeten bewaeren Waerup is in de vroetscop gesloeten dat men die voirsz exchijs sal doen bewaeren ter tijt toe dat men van de voirsz materie eyntelicke gesloeten sal hebben met die van de gerechte ende oude ende nyeuwe tresoriers ende mede met eenigen uuyt die van de vroetscop omme perfectelicken te weeten hoe dat men oirboirlicxste sal moegen doen met der voirsz exchijs
</main>
<end>
</end>