Compilatiecorpus Historisch Nederlands 1.0 (CHN): ambtelijke teksten 1250-1800: gouda_1534_1

<begin>
Up huyden den xxxen Mey anno XXXIIII es die vroetscap verthoent
</begin>
<main>
hoe dat van node was te onderhouden die scutteryen hier voirtijts upgestelt te weten van de voetboech ende van de hantbussen ende dat dieselve scutterien van gheender meeninge en waeren eedt te doen ofte eenige scutterie onderhouden ten waere dat men hemluyden onverbrekelicke toeseyde dat alle jaeren eene van deselve scutterien schieten souden ende hebben hondert croenen mitsgaders andere proufyten van wijn ende anders gemerct dat men eens ofte twemalen hemluyden hadde doen copen tabbairden van coluere te vergeefs tot eene bespottinge ende derisie Wairop es by de vroetscap gesloten ende geaccordeert by de meeste stemmen dat men die voorsz twee scutteryen van nyeus weder opheffen ende eeden sal ende dat men hemlieden van der stede wegen toeseggen sal alle jaers een van de scutterie te doen scieten ende hemluyden van der stede wegen te laten genieten alsulcke emolumenten ende proufyten als zyluyden gewoenlick sien ende behoren te genieten
</main>
<end>
</end>