Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1316_1

<begin>
Wi willaem heynrick aden zoene Ende Ghisebrecht dullard willaems zone scepene te haerlem maken cont ende orconden allen luden
</begin>
<main>
Dat voer ons quam Jacop nannen zoene van scalchwijc Ende verliede voer ons dat miester Gherrijt scolaster van haerlem houder van desen letteren hadde an al sijn land ende sijn erue soe waer ofte in wes ban soet gheleghen is of hu soet ghehieten is ein pont ghelts jaerlix renten dat hi him wl ende al bitalet hadde te bamisse jaerlix te bitalen ende gaft him oec vp te vrien eyghen ende scouttet quite voert alse van scoude die hi Jacop verliede dat hi miester Gherride mier scoudich was ende hi him noch gheuen ende vit doen soude Gaf die jacop dicke voerseyt dien miester gherride vornomet vp te vrien eyghen ende scoutet quite voer ons al sijn goet huisigghe land ende erue rorende ende onrorende soe waer dat gheleghen is ende soe hu dat ghehieten is ende ontfenghet weder van him toet erfhure om vier pont hollans jaerlix immer te bitalen tote bamisser market van jaer te iaer in dier manniere dat man hure plecht te bitalen ende liettet toet sijns selues miester gherrijts trouwen staen wat hi him mier gheuen ofte vit doen wilde bouen dat hi him bitalet heft ende scouten daer vp quite voer ons van allen dinghen sonder alle ferpelinghe
</main>
<end>
Orconde desen letteren gheseghelt met onsen seghelen vit ghehanghen in dien jaer ons hieren dertienhondert ende sestiene des manen daghes voer vastelauent
</end>