Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1320_1

<begin>
Wj Jan van dier scure alebrecht wouters zoene Ende symon hughen zoene van dier lane scepenne te harlem Orconden allen luden
</begin>
<main>
dat voer ons quam claes hondertpont vter liere ende louede voer ons miester gherride scolaster te harlem houder van deser letter vijfpont hollans ende tien grote tornoze houelinghe te bitalene vrighelt toter eirster delfmarket ghehiel ende al sonder allen ferpel vort verliede hi claes voerseit voer ons dat hi viif morghen lands ende tuie hont van miester gherride te hure hadde noch dertien jare die morghen elk omme viifende tuintich scelligh jaerlix maer noch die naeste vier jare soude hi van dier morghen jarlix gheuen einpont van gracien doer der quader jare wille die alte suaer gheleden zien oec mede liede hi claes vornomet dicke dat die termiin van deser hure vorscreuen te bitalen altoes is ende sel wesen toet onser vrouwen lichgmisse of purificaci
</main>
<end>
Orconde deser letter biseghelt met onsen seghelen Ghegheuen jnt jaer ons hieren dertienhondert ende tuintich des manen daghes na grote uastelauent
</end>