Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1330_1

<begin>
Wj willaem van tetrode Ende Dirc van der spaerne Scepene in haerlem Oerconden
</begin>
<main>
dat Jan van rollant ende aechte siin wiif voer ons quamen Ende verlieden dat Jan veren batten zone daer god die ziele of hebben moete cofte ieghen aechten voerseyt ene morghen ghiestlants ende ene morghen broeclants die hoer an quamen van Jan berwouts zone voer ghelt dat hi hoer scoudich was daer hoer dat lant voer gheset wert bi den rechte voer den rechter ende voer die bure te voerhoute van wilken tue morghen lants die ene morghen ghiestlant is ende Jan berwouts zoens huus op staet ende die ander morghen hiet roelofs venne die leghet an twe sticken alse an vier hunt ende an tue hunt wilc lant voerseyt Jan van rollant ende aechte siin wiif verlieden dat Jan veren batten zone him al bitaelt heft dien lesten penninc mitten eersten voert oerconden wi dat hughe brouwer verliede voer ons dat hi doe bureman was te voerhoute Ende hi die tue morghen lants halp scatten tot aechten bihoef ende hi daer omme swoer
</main>
<end>
Jn oerconde desen brieue bizeghelt mit onsen zeghelen ghegheuen jnt iaer ons heren m ccc ende dertich in sinte Alebrechts daghe
</end>