Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1370_1

<begin>
Wi jan scody ende ghisebrecht hobben zoen scepene in haerlem oirconden
</begin>
<main>
dat voer ons quam euer van den houte ende verliede dat hi vercoft heeft den nuwen gasthuse tote haerlem [aenstanighe] renten als hier na ghescreuen staen Eerst op jan walrauens huus ende erue legghende ende staende twisschen aernt van wtgheest ende reyner dirc roex soen [twee] [scellinghe] goeds ghelts siaers zonder waerdeheerscap Item op claes philps soens huus legghende ende staende in der borchgrauinnen strate twisschen heren jan den gruter ende gher galen soen twee scellinghe en zes penninghe goeds ghelts [siaers] zonder waerdeheerscap item op jacop hanne tymans soens camer metten erue legghende ende staende in haeren scachen strate twisschen aernt van wtgheest ende aernt [vlas] scellinghe payment siaers jaerlix te betalen tot bamisse Ende verliede al betaelt den lesten penning metten eersten ende heefse den nuwen gasthuse voerseit gheloeft te waren als men vrye renten binnen der vrihede van haerlem sculdich es te [waren]
</main>
<end>
in oirconde desen brieue bezeghelt met onsen zeghelen int iaer ons heren mccc ende tseuentich woensdaechs na onser vrouwen dach anuntiacie
</end>