Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1370_2

<begin>
Wi willaem van scoten ysebrand van der scure dirc die blote Ende ghisebrecht hobben soen scepene in haerlem oirconden
</begin>
<main>
dat voir ons quamen int gherechte garbrand didde michiels soen Ende tydeman ziin broeder ende daer een zegghen zeyden twischen Reyner doeuen soen an die ene zide Ende valken pieters soen an die ander zide alse van viiftich roesede mottoene daer reyner voirseyt of aen ghesproken hadde valken voirnoemt dat hi hem die te scade ghedaen hadde an sinen lande tot akersloet des si an beyden ziden ghelieden dat ziis an den tween zegghers voirscreuen van dien scade ghebleuen waren hoer zegghen te houden ende te voldoen op ene pene van hondert scilden Ende die pene te gaen daer ze die zegghers voirnoemt metten rechte van haerlem wizen zullen Ende die te ghelden die hoer zegghen niet en helde noch en voldede daer hoer zegghen of was In den eersten dat valke comen zel een vridaghe naest comende tot akerslote Ende maken reyner doeuen soen daer ene beloken hand Ende zweren met dat hi op brengt ende of laet Ende si viue ende twintich met hem van akerslote Ende van wermer die hem volghen dat hi hem daer mede verbetert heeft alle zine scade die hi hem ghedaen mochte hebben an zinen goede tot akerslote Ende waer dat die scoute van akerslote hem dien eed niet stauen en woude So soude valke voirnoemt sinen stauer voir hem brenghen op sinen cost Ende waer dat zake dat valke voirseyt dit recht niet en dede in allen manieren als voirscreuen staet So soude hi Reyner doeuen soen gheuen die viiftich roesede mottoene daer hi hem om beclaecht heeft Ende dit voirscreuen zegghen te houden ende te voldoen is borghe tydeman didde michiels soen voir valken voirnoemt Ende mag ysebrands soen voir reyner doeuen soen
</main>
<end>
Jn Oirconde desen brieue bezeghelt met onsen zeghelen int Iaer ons heren m ccc ende tseuentich des vridaechs na sinte baefs dach
</end>