Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1378_1

<begin>
Wj aernt ian ende claes ian iacob zoens zoen scepene in haerlem oirconden
</begin>
<main>
dat voir ons quam gheriit van spaernewoude ende gheliede dat hi vercoft heeft den gasthws miesters tot haerlem toeter armer behoef dertien scellinghe goet ghelts siaers in rechten poortrechte des die elf scellinghe staen zullen vp valken hws ende erue van oostzaenden legghende ende staende vp oude haerlem twischen vicker jonghen zoen an die ene zide ende iacob die rode an die ander zide afterwaerts streckende an hughe roden ende pieter wouter ende twie scellinghe vp ymme tieten dochter ende claes wiggherzoens twie huze ende erue beide legghende ende staende vp oude haerlem twischen der poorte strate an die ene zide ende iacob dierode an die ander zide beide afterwaerts streckende an iacob voirscreuen Ende verliede al betaelt den lesten penninc metten eersten ende heeft ze gheloeft te waren als men vrye renten binnen der vryhede van haerlem scoudich is te waren
</main>
<end>
In oirconde desen brieue bizeghelt met onzen zeghelen int iaer ons heren mccc acht ende tseuentich svrydaghes na sinte baerthelmieus dach apostel
</end>