Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1381_1

<begin>
Wij hobbe hone Ende ghisebrecht jans soen scepene in haerlem oirconden
</begin>
<main>
dat vor ons quamen pieter dedde die wachter ende clemeynse siin wiif Ende up gauen met ghezamender hand tenen vryen eyghen in rechter aelmosse den nuwen gasthuse te hairlem toter armer behoef dat halue huus metten erue legghende ende staende in onser vrouwen broeder straat twischen coman pieters kinder an die ene zide Ende pieter clais stwfs soen an die ander zide voird gauen si up tenen vryen eyghen den gasthuse voirscreuen in rechter aelmosse hoer beste bedde met sinen toebehoren Ende hoer beste scryen Ende verlieden al betaelt den lesten penning metten eersten Ende hebbent hem gheloeft te waren als si sculdich siin te doen met zulker hure als daer up staet
</main>
<end>
In oirconde desen brieue bezeghelt met onsen zeghelen jnt jair ons heren mccc een ende tachtich des sondaghes na sinte jacobs dach in den zomer
</end>