Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1389_2

<begin>
Wj baertout van assendelf ende baertout van huesen scepene in haerlem oirconden
</begin>
<main>
dat voir ons quam gheriit hone ende up gaf tenen vryen eyghen den kercmeesters van der groter kercke der stede voirseyt totter heyligher kerke behoef ziin husinghe metten Erue die hi nu ter tijt woenlic bewoent Ende die twie husen die elcs an ander daer after ghetymmert ziin Ende daer toe dat Erue dat willem die mandemaker weder gheriit honen ghehuiert hadde willaems tymmeringhe wtgheset dat ander voirscreuen al legghende ende staende twisken dirc van foriest an die Ene zide ende tgrote kerchof an dander zide afterwaerts streckende an dirc van foriest Ende voirt om dircs hoerne van foriest beziden wtgaende twisken dirc ende tgrote kerchof beyde voirscreuen also verre als willaems reyghen poert plachte staen Ende verliede al betaelt den lesten penninc metten eersten Ende heeftet hem gheloeft te waren als hi sculdich is te doen met twintich scellinge goets ghelts siaers die jan van scoten daer up te hure heeft
</main>
<end>
In oirconde desen brieue bezeghelt met onsen zeghelen int Iaer ons heren mccc neghen ende tachtich op sinte michiels dach
</end>