Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1402_1

<begin>
Scoute scepene ende Rade der stede van haerlem doen Cond allen luden
</begin>
<main>
want onse lieue ghenadighe here van hollant met zinen openen brieuen ghegheuen heeft Jan vlaminc ghiisbrechts soen tboodambocht binnen onser stede tot zinen liue toe ende voirt van zinen liue te comen op adriaen zinen Outsten soen die hi nv ter tiit heeft Ende na costumen die boden van haerlem alle onghelt in onser stede te ghelden vri pleghen te sitten So hebben wij ghegheuen ende gheuen met desen brieue Jan vlamine voirscreuen behoudeliic hem ziin poirtrechts ziin leuen lanc durende te wonen ende te wesen in onser stede scotvri waecvri ende alle ander onghelt vri dat in onser stede nv ter tiit valt of namaels vallen mach te ghelden wtgheset den exsiis Ende na Jan vlamincs doot voirscreuen adriaen ziin soen ziin leuen lanc vri te sitten in alre manieren als voirscreuen staet
</main>
<end>
Jn Oirconde desen brieue beseghelt met onser stede zeghel hier beneden aen ghehanghen Jnt iaer ons heren 1400 ende twe op sinte gheertruden auont
</end>