Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1403_2

<begin>
Wij willem van adrichem diedewiins soen Ende willem daenen soen van Riedwiic scepenen in haerlem oirconden
</begin>
<main>
dat voir ons quam Jan philps soen van zandwiic Ende gheliede dat hi vercoft heeft tot enen vryen eyghen den gasthwysmeesters tot haerlem tot des gasthwys behoef enen gouden enghelschen nobel siaers vp pieter jan brechten soens hws metten erue legghende ende staende vp bakenesse twisken pieter pieter wissen soen an die Ene zide gheriit aelbrechts soen an dander zide afterwaerts streckende an baudiin wilbrants soen jaerlicx te bitalen tot bamisse Ende verliede al bitaelt den lesten penninc metten eersten Ende heeften den gasthuyse voirscreuen gheloeft te waren als men vrye renten binnen der vryhede van haerlem sculdich es te waren des ziint voirwaerde dat pieter jan brechtensoen voirscreuen desen voirgheroerden nobel siaers Of lossenen mach tot welke [tiit] dat hi wil met sestien der nobels voirscreuen Ende metten renten na den beloep vander [tiit]
</main>
<end>
In oirconde desen brieue beseghelt met onsen seghelen Jnt Jair Ons heren 1400 ende drie swoensdages na sinte mathiis dach apostel
</end>