Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1406_2

<begin>
Wij Jan voechts soen ende Claes peters soen scepenen in haerlem orconden
</begin>
<main>
dat voir ons quam Claes vander beke Euer ockers zoen ende geliede dat hi vercoft ende quijt ghescouden heeft tot eenen vrien eyghen Eenen eersamen vader in gode heren gherit van ockenberghe Abt van Egmonde dat sestendeel van dezen lande ende goede nae ghescreuen dat Claes voirseyt teghens heren floris van aricom cofte ende den Abt van Egmonde voirgenoemt die brieue daer of ouer ghegeuen heeft die hi hadde van heren floris voirseyt Jnden eersten in den ambocht van zwamerdam ende riewiic bi den nuwen weghe zes gerden die houden twaelf morghen landts die Symon teten soon te bruken pleicht Item bi den langhen lande een ende twintich morghen lands die gherit soete te bruken pleecht Item daer bi noch viiftien morghen lands die smacht te bruken pleecht Item in polmet achtaluen morghen lands die Jan I van lis te bruken pleecht Item wten pacht wter wijc twintich oude gouden vrancrix scilde syaers ende verliede al betaelt den lesten penninc mitten eersten vanden sestendeil vanden lande ende goeden vorseit Ende heeftet hem gheloeft te waren alsmen vri landt ende goede sculdich is te waren mit sulker wercwaer al daer toe hoirt inden ban dairt in gheleghen is
</main>
<end>
In orconde dezen brieue beseghelt mit onsen seghelen Ende om der meerre sekerheit willen soe heb ic Claes vander beke voirseit dezen brief mede beseghelt mit mynen seghel Int Iaer ons heren 1400 ende zesse des vrida ghes na onser vrouwen dach te lichtmisse
</end>