Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1406_3

<begin>
Wj Claes meynaerts zoen ende dircj gheriit wyen zoen scepenen in hairlem Oirconden
</begin>
<main>
dat voir ons quam jan van sparenwoude ende verlyede dat hi vercocht heeft tot enen vryen eyghen den heilighen gheests meesters bynnen hairlem tot des heylichs gheests behoef aldair ende den gasthwis meesters bynnen hairlem tot dhes gasthwis behoef al dair jn ghezamender hant Enen enghelsen nobel tsiaers dats te verstane den heilighen gheest enen haluen enghelsen nobel tsiairs ende den gasthuse enen haluen enghelsen nobel tsiairs Op ziin hwis ende op ziin erue leggghende ende staende in die damstrate twisken dirc heynincs erfnaem an die ene zide ende der strate an die ander zide afterwaerts streckende an die steghe jairliix te betalen tot bamisse Ende heeft hem dese renten voirseit gheloeft te waren als men vrye renten bynnen der vryehede van hairlem sculdich is te waren Des ziint voirwaerde dat jan van sparenwoude voirscreuen desen voirseyden nobel tsiairs of lossenen mach tot welker tiit dat hi wil met seuentyen enghelsen nobels Ende met den renten na den beloop van der tiit
</main>
<end>
In Oirconden desen brieue bezeghelt met onsen zeghelen jnt iaar ons heren 1400 ende sesse op sente odulfs dach
</end>